अमेरिकाले बढाएको चिनियाँ इलेक्ट्रिक कारको भन्सार विवादमा भ्लादिमिर पुटिन पनि सामेल

अमेरिकाले इलेक्ट्रिक सवारीसाधन लगायतका चिनियाँ सामानमा भन्सार बढाउने कदमप्रति चीन आक्रोशित छ । चीनको समर्थनमा रुसी राष्ट्रपति भ्लादिमिर पुटिनले अमेरिकाले चिनियाँ सामानमा बढ्दो करलाई अनुचित प्रतिस्पर्धा भनेका छन् ।

अमेरिकाको यो कदमले विशेष गरी अमेरिकी बजारमा प्रवेश गर्ने चीनमा बनेका ईभीलाई असर गर्नेछ । जसमा शुल्क १०० प्रतिशत भन्दा बढी र सेमीकन्डक्टरमा करिब ५० प्रतिशत भन्सार बढेको छ । सेमीकन्डक्टर इलेक्ट्रोनिक सामानको निर्माणका साथै नयाँ प्रकारका सवारी साधनमा प्रयोग हुने प्रमुख कम्पोनेन्ट हो । अन्तर्राष्ट्रिय सञ्चारमाध्यमले यो कदमलाई व्यावहारिक भन्दा पनि राजनीतिक स्टन्टका रूपमा व्याख्या गरेका छन् ।

चिनियाँ कम्पनी बीवाईडी, चेरी र नियो जस्ता कम्पनीले विश्वव्यापी बजारमा आफ्नो प्रभुत्व जमाउँदैछन् । बीवाईडीले विश्वबजारमा ईभी क्षेत्रमा टेस्लासँग प्रतिस्पर्धा गर्दैछ । तर हालै यसले अमेरिकी अटोमोबाइल बजारलाई जटिल भनेर वर्णन गरेको छ । कम्पनीले युरोपेली बजारका साथै भारतलगायत एसियामा पनि आफ्नो उपस्थिति विस्तार गरिरहेको छ ।

बीवाईडी इलेक्ट्रिक कार चीनमा करिब १२ हजार डलरमा बिक्री हुने गरेको छ । सो कारको डिजाइन र ड्राइभिङका कारण निकै चर्चामा छ । कम लागत र भरपर्दो विकल्पका कारण बीवाईडी अमेरिकी बजारमा कडा प्रतिस्पर्धा गर्न सक्नेछ ।