चीनमा यो साताका समाचार : फोर्ड देखि बीवाईडी र चेरी देखि अन्य कम्पनी चर्चामा

चिनियाँ सवारी साधन बजार विश्वकै लागि चासोको विषय बन्छ । पछिल्लो समयमा विशेष गरी विद्युतीय सवारी अर्थात ईभीको क्षेत्रमा चीनले विश्वलाई नै चकित पार्ने गरी कार्य गरिरहेको छ । यसका साथै अन्य पेट्रोलियम पदार्थबाट चल्ने सवारी साधन समेत चर्चामा छन् ।

चिनियाँ बजारमा फोर्ड मोटर कम्पनीले ब्रोङ्को ईभीलाई स्थानीय स्तरमै प्योर इलेक्ट्रिक र रेन्ज–एक्सटेन्डेड भर्सन उतार्ने तयारी गरेको छ । चाइनिज ईभी बजारमा आफ्नो उपस्थिति बलियो देखाउनका लागि फोर्डले यस्तो योजना ल्याएको बताएको छ ।

लिपमोटरको बी प्लेटफर्ममा आधारित नयाँ स्मार्ट ईभी विकासका लागि लिपमोटर र एफएडब्लुले रणनीतिक सहकार्यलाई अझै बलियो बनाउने भएका छन् । लिपमोटरको बी–प्लेटफर्ममा आधारित ईभी बी१० र बी०१ ले राम्रो पर्फमेन्स देखाइरहेका छन् । यसकारण नै सन् २०२५ को पहिलो अर्धवार्षिक अवधिमा लिपमोटरका २० हजार गाडी निर्यात भएका छन् । यी मध्ये ८४ प्रतिशत चाहिं युरोपमा निर्यात भएका छन् ।

चेरीले भारतको जेएसडब्लु ग्रुपका लागि अटो कम्पोनेन्ट सप्लाई गर्ने गरी मात्र साझेदारी गरेको स्पष्ट गरेको छ । यसका लागि आवश्यक प्रविधि विकास जेएसडब्लु आफैले गर्नेछ र कुनै टेक्नोलोजी ट्रान्सफर हुने छैन । जेएसडब्लु ग्रुपले भारतमा एमजीका गाडी बिक्री–वितरण गरिरहेको छ ।

ग्रेटवाल मोटर्स अर्थात जीडब्लुएम अब रसिया, दक्षिण अमेरिका र अन्य राइट ह्यान्ड ड्राइभ बजारमा केन्द्रित हुने भएको छ । सन् २०२५ मा जीडब्लुएमले ५ लाख २० हजार सवारी साधन निर्यात गर्ने लक्ष्य लिएको छ । यद्यपि वर्षको पहिलो अर्धवार्षिक अवधिमा १ लाख ९८ हजार युनिट मात्र बिक्री गर्न सफल भएको छ । यो भनेको वार्षिक लक्ष्यको ३८ प्रतिशत हो । रसियामा यसको बिक्री २१.५ प्रतिशतले घटेको छ भने ब्राजिलियन बजारमा २० प्रतिशत बजार बढेर १५ हजार युनिट पुगेको छ ।

चीन मात्र नभएर विश्वमै अग्रणी ईभी उत्पादक कम्पनीको रुपमा परिचित बीवाईडीले सन् २०२६ देखि पाकिस्तानमा ईभी एसेम्बली सुरु गर्ने भएको छ । पाकिस्तानको कराँचीमा स्थानीय वितरक मेगा मोटरसँग मिलेर बीवाईडीले फ्याक्ट्री स्थापना गर्ने भएको छ । सन् २०२५ को अप्रिल देखि यसको निर्माण प्रारम्भ भएको छ । यसको वार्षिक उत्पादन क्षमता २५ हजार युनिट छ । सो प्लान्टमा इलेक्ट्रिक र प्लग–इन हाइब्रिड गाडी एसेम्बल हुनेछन् ।

मर्सिडिज बेन्जले चीनमा एडीएएस अर्थात एडास सप्लायरलाई परिवर्तन गरेको छ । कम्पनीले पहिले एनभिडियालाई केही चाइनिज मोडलमा अटोनोमस ड्राइभिङ सिस्टमका लागि एनभिडियाका उत्पादन प्रयोग गरिरहेकोमा अब भने मामेन्टाका उत्पादन प्रयोग गर्ने भएको हो । एनभिडिया भने यसबाट असन्तुष्ट भएको बताइएको छ ।