भित्रिए चांगनका विद्युतीय भ्यान, सीजी मोटर्सले ल्याएका विद्युतीय भ्यानका यस्ता छन् विशेषता

काठमाडौं – नेपाली बजारमा हाल नेटा भी विद्युतीय कार बिक्री–वितरण गरिरहेको सीजी मोटर्सले चांगनका विद्युतीय भ्यान समेत भित्र्याएको छ ।

हाल विशेष गरी दीगो र अन्य केही कम्पनीका विद्युतीय भ्यान चलिरहेको समयमा चांगनको भी५ समेत भित्रिएको हो । पेट्रोलियम पदार्थको बढ्दो मूल्यका बीच लामो दुरीमा समेत चलाउनका लागि यस्ता विद्युतीय भ्यान उपयोगी हुने छन् । ११ सिटे सो विद्युतीय भ्यानले सिंगल चार्जमा ३०० किलोमिटर दिने दावी गरिएको छ ।

चांगन भी५ मा ४१.८६ किलोवाट आवरको सीएटीएल ब्याट्री प्रयोग गरिएको छ । १७५ एमएम ग्राउन्ड क्लियरेन्स भएको सो भ्यानलाई अधिकतम १०० किलोमिटर प्रतिघण्टा सम्मको गतिमा कुदाउन सकिन्छ ।

चांगन भी५ मा स्ट्यान्डर्ड चार्जरको रुपमा ३.३ किलोवाट क्षमताको नर्मल चार्जर प्रयोग गर्न सकिन्छ । यसका साथै कम्पनीले ग्राहकलाई ६.६ किलोवाटको चार्जर समेत निःशुल्क उपलब्ध गराउने छ ।

सीजी मोटर्सले यो इलेक्ट्रिक भ्यानको मूल्य ४२ लाख ५० हजार रुपैयाँ तोकेको छ ।

नेटा भी इलेक्ट्रिक कार र ओला इलेक्ट्रिक स्कुटर बिक्री गरिरहेको सीजी मोटर्सले आगामी दिनमा भी७ मोडल समेत नेपाली बजारमा उपलब्ध गराउने जनाएको छ । सीजी मोटर्सले विद्युतीय सवारी भित्र्याउने क्रम बढाएसँगै चार्जिङ पूर्वाधारलगायत आवश्यक सेवा सुविधा बिस्तारलाई उच्च प्राथमिकता दिएको जनाएको छ।