सीजी मोटर्सले अब इलेक्ट्रिक ट्याक्सी ल्याउने

काठमाडौं – नेपाली बजारमा नेटा भी र अन्य इलेक्ट्रिक सवारी साधन उपलब्ध गराइरहेको सीजी मोटर्सले इलेक्ट्रिक ट्याक्सी भित्र्याउने भएको छ । हाल काठमाडौं उपत्यका लगायतका सहरी क्षेत्रमा पेट्रोलियम पदार्थबाट चल्ने ट्याक्सी मात्र उपलब्ध भइरहेको समयमा आगामी दिनमा इलेक्ट्रिक ट्याक्सी उपलब्ध गराउने कम्पनीको भनाइ छ ।

एक पटकको फुल चार्जमा ३ सय किलोमिटर चलाउन सकिने उक्त ट्याक्सीको वारेमा थप विवरण भने सार्वजनिक गरिएको छैन । ट्याक्सी व्यवसायमार्फत वातावरण संरक्षणमा योगदान पु-याउनुका साथै व्यवसायीहरुलाई थोरै खर्चबाट धेरै आम्दानी गर्न सहयोग पुगोस् भन्ने उद्देश्यले कम्पनीले ट्याक्सी सेगमेन्टका विद्युतीय सवारी भित्र्याउने योजना बनाएको बताइएको छ ।

नेपाली बजारमा चौधरी ग्रुप अन्तर्गतको सीजी मोटर्सले हाल इलेक्ट्रिक कार नेटा भीका साथै केवाईसी भी५ मिनी भ्यान बिक्री–वितरण गरिरहेको छ भने ओला इलेक्ट्रिक स्कुटर समेत छिट्टै नै बिक्री शुरु गर्ने तयारी गरिरहेको छ ।