५ लाख ४९ हजार ९०० मूल्यमै सीएफमोटोको प्रिमियम र पावरफुल २५० डुअल ईएफआई सार्वजनिक

काठमाडौँ–सीएफमोटोको नेपालका लागि आधिकारिक वितरक ऋषि ट्रेड सेन्टरले नयाँ मोटरसाइकल लन्च गरेको छ । कम्पनीले विहिबार एक कार्यक्रममाझ सिएफमोटो २५० डुअल इएफआई मोटरसाइकल सार्बजनिक गरेको हो ।

कार्यक्रममा मोटरसाइकल पारखी, चर्चित बाइकर, सामाजिक सञ्जालका इन्फ्लुएन्सर, सञ्चारकर्मी तथा सीएफमोटोको अन्तर्राष्ट्रिय टोलीका प्रतिनिधिहरूको उपस्थिति रहेको थियो । कार्यक्रममा सहभागी अन्तर्राष्ट्रिय प्रतिनिधिको उपस्थितिले नेपाली बजारप्रति कम्पनीको प्रतिबद्धता झल्किएको पनि बताइएको छ ।

कम्पनीका प्रतिनिधिहरूले नेपालका विभिन्न सडक र भौगोलिक अवस्थालाई ध्यानमा राखेर तयार गरिएको यो मोटरसाइकलले प्रदर्शन, टिकाउपन र बहुउपयोगिताको सन्तुलन प्रदान गर्ने विश्वास व्यक्त गरेका छन् ।

यो मोटरसाइकल सामान्य सडक तथा अफरोड दुवै यात्राका लागि उपयुक्त हुने गरी परम्परागत सीमाभन्दा बाहिर साहसिक यात्रा खोज्ने राइडरलाई लक्षित गरेर तयार पारिएको कम्पनी दाबी छ ।

२४९ सीसी क्षमताको सिंगल सिलिन्डर, फ्युल इन्जेक्सन इन्जिन जडान गरिएको यस मोटरसाइकलले राम्रो शक्ति र इन्धन दक्षता प्रदान गर्नुका साथै थ्रोटल प्रतिक्रिया सहज हुने बताइएको छ ।

मोटरसाइकलमा सहरका सडकदेखि अफरोडसम्म सहज रूपमा चलाउन सकिने ’डुअल पर्पोज’ डिजाइन रहेको छ । २४५ मिलिमिटर ग्राउन्ड क्लियरेन्स भएकाले नेपालका विभिन्न सडक अवस्थाका लागि उपयुक्त मानिएको छ । यसमा डिस्क ब्रेक र उन्नत ब्रेक प्रणाली जडान गरिएको छ, जसले सवारी सुरक्षामा सहयोग पु¥याउने बताइएको छ । हल्का तर बलियो फ्रेमले मोटरसाइकललाई चुस्त र टिकाउ बनाएको छ ।

सीएफमोटो २५० डुअल ईएफआईको प्रारम्भिक मूल्य ५ लाख ४९ हजार ९ सय रुपैयाँ तोकिएको छ । यो मोटरसाइकल पोलार ह्वाइट, लाइम ग्रीन र टुन्ड्रा ग्रे गरी तीन रङमा उपलब्ध हुनेछ ।

सीएफमोटो विश्वभर चिनिएको मोटरसाइकल निर्माता कम्पनी हो । कम्पनीले उच्च प्रदर्शन क्षमताका मोटरसाइकल, कृषि प्रयोजनका चार पांग्रे सवारी तथा पावर स्पोट्र्स सवारी साधन उत्पादन गर्दै आएको छ ।