क्याटलले ग-यो १ हजार किलोमिटर रेन्ज दिने स्केटवोर्ड चेसिसको सफल परिक्षण

इलेक्ट्रिक भेइकलमा प्रयोग हुने ब्याट्रीको उत्पादनमा ख्याती कमाएको क्याटलले स्केटबोर्ड चेसिसको सफल परिक्षण गरेको छ । होजोन मोटर्ससंगको साझेदारीमा विकास गरिएको सो चेसिस प्रयोग भएको कारले सिंगल चार्जमा १ हजार किलोमिटर रेन्ज दिएको कम्पनीले जनाएको छ । नेटा एस बी क्लास सेडान कारमा सो चेसिस सेयर गरेर परिक्षण गरिएको हो ।

परिक्षणका दौरान नेटा एसले १०.२५ किलोवाट आवरको विद्युत खपतमा १०० किलोमिटर रेन्ज दिएको थियो भने कारलाई ५ मिनेट चार्ज गर्दा ३०० किलोमिटर गुडेको थियो । सो नयाँ चेसिस प्रयोग भएको कार अर्को वर्ष लन्च हुने कम्पनीले जनाएको छ ।

क्याटल इन्टिग्रेटेड इन्टेलिजेन्ट चेसिस समेत भनिने स्केटबोर्डमा कम्पनीले ब्याट्री, इलेक्ट्रिक मोटर र अन्य जटिल कम्पोनेन्टलाई एउटै प्लेटफर्मममा सामेल गरेको छ ।

सो चेसिस सेयर गरी कार निर्माण गर्दा उत्पादन लागत कम पर्ने, भेइकलको तौल कम हुनुको साथै इनर्जीको खपत समेत कम हुने जनाइएको छ । साथै कारभित्रको प्यासेन्जर स्पेस समेत पर्याप्त हुने दाबी गरिएको छ ।

स्केटबोर्ड चेसिसलाई कम्पनीले हाई भोल्टेज र लो भोल्टेज सिस्टममा ल्याउनुको साथै नयाँ स्टेरिङ एण्ड ब्रेकिङ सिस्टम, चेसिस डोमेन कन्ट्रोलर र सेल–टु–चेसिस टेक्नोलोजीलाई समेत प्रयोगमा ल्याउने उद्घोष गरेको छ ।