६ महिनामा चीनमा बिक्री भयो १ करोड ४० लाख बढी कार, बीवाईडी पहिलो स्थानमा

काठमाडौं– विश्वको सबैभन्दा ठूलो अटो बजार चीनमा ६ महिना अबधीमा १ करोड ४० लाख बढी कार बिक्री भएको तथ्यांक वाहिर आएको छ । चाइना प्यासेन्जर कार एसोसिएसन र चाइना एसोसिएसन अफ अटोमोबाइल म्यानुफेक्चरर्सले हालै सार्बजनिक गरेको रिपोर्ट अनुसार वर्ष २०२४ को जनवरीदेखी जुनसम्म १ करोड ४० लाख ४७ हजार यूनिट कार बिक्री भएको हो ।

सो अबधीमा कुल १ करोड ३८ लाख ९१ हजार कार उत्पादन भएको रिपोर्टमा उल्लेख छ । ६ महिनाको यो अबधीमा बिक्री भएको उक्त संख्या अघिल्लो वर्षको सोही अबधीको तुलनामा ६.१ प्रतिशतले बढी हो । यसैगरी, ग्यासोलिन कारको तुलनामा न्यू इनर्जी भेइकलको सेल्स उच्च दरले बृद्धि भएको छ ।

सो अबधीमा ४९ लाख ४४ हजार यूनिट न्यू इनर्जी भेइकल बिक्री भएको रिपोर्टमा उल्लेख गरिएको छ । न्यू इनर्जी भेइकलमा सामेल ब्याट्री इलेक्ट्रिक र हाइब्रिड कारको बिक्री अघिल्लो वर्षको सोही अबधीको तुलनामा ३२ प्रतिशतले बृद्धि भएको छ । यो सेग्मेन्टको बजार हिस्सा ३५ प्रतिशत माथी पुगेको रिपोर्टमा उल्लेख छ । न्यू इनर्जी भेइकल उत्पादनमा विश्वकै अग्रणी ब्राण्ड बीवाईडीले मात्रै सो अबधीमा कुल १६ लाख ७ हजार ईभी बिक्री गर्न सफल भएको हो ।

चीनमा बिक्री हुने कुल कारमा टप १० ब्राण्डको हिस्सा ८४.८ प्रतिशत पुगेको छ । यो सूचीमा बीवाईडी पहिलो र चेरी दोस्रो स्थानमा रहेका छन् भने जीली, चांगन, एसएआईसी–फक्सवागन, एफएडब्लु–फक्सवागन, ग्रेटवाल, टेस्ला, जीएसी–टोयोटा र एसएआईसी क्रमशः तेस्रो देखी १० औं स्थानमा समेल छन् ।

चीनको आफ्नै ब्राण्डको बजार हिस्सा ५६.५ प्रतिशत रहँदा जर्मन ब्राण्डको १९.४, जापनिज ब्राण्डको १४.९ र अमेरिकन तथा फ्रेन्च ब्राण्डको हिस्सा १९.१ प्रतिशत छ ।