सुरक्षा चेतावनीलाई चुनौती दिँदै बाढीग्रस्त क्षेत्रमा राहत बोकेर पुगे बीवाईडीका गाडी

काठमाडौं–चीनको गुआङ्सी क्षेत्रमा टाइफुन मेसाकका कारण आएको विनाशकारी बाढीका बीच एउटा अनौठो र साहसिक नागरिक उद्धार अभियानको चर्चा भइरहेको छ ।

चिनियाँ मिडिया १६३ का अनुसार, कम्पनीका उच्च अधिकारीहरूको सुरक्षा चेतावनीलाई समेत बेवास्ता गर्दै बीवाईडी डेन्जा र फ्याङ चेङ बाओका सवारी चालकहरू स्वतःस्फूर्त रूपमा गहिरो बाढी र हिलो जमेका सडकहरू पार गर्दै प्रभावित क्षेत्रमा राहत पु¥याउन पुगेका हुन् ।

टाइफुन मेसाकका कारण स्थानीय जलाशयहरू फुट्दा र नदीहरू भरिँदा थुप्रै गाउँहरू पूर्ण रूपमा सम्पर्कविहीन भएका थिए । परम्परागत इन्धनका गाडीहरू गुड्न नसक्ने र असक्षम हुने अवस्थामा ती चालकले आफ्ना न्यू इनर्जी भेइकल(एनईभी) लिएर सिधै बाढीको खतरनाक पानीमा गाडी गुडाएका थिए ।

यस उद्धार कार्यमा डेन्जा एन९ लक्जरी प्लग–इन हाइब्रिड र फ्याङ चेङ बाओ ८ जस्ता हार्डकोर अफ–रोड एसयूभी प्रयोग गरिएका थिए ।

यी एनईभीका इन्जिनियरिङले उच्च–भोल्टेज ब्याट्री इन्सुलेशन र बलियो वेडिङ क्लियरेन्स लाई जोड दिएको छ । फ्याङ चेङ बाओ ब्रान्डको चेसिसले विशेष अन्डरबडी संरचनात्मक सीलिङका साथ ८०० मिमी सम्मको प्रमाणित वेडिङ गहिराइ प्रदान गर्दछ । यही विशेष भौतिक प्यारामिटरका कारण यी गाडीहरूले पानी भरिएको र हिलोयुक्त प्रान्तीय मार्गहरूमा सजिलै ट्रयाक्सन कायम राख्न सफल भएको जनाइएको छ ।

नागरिकहरूको यो प्रयास प्रशंसनीय भए पनि बीवईडीका वरिष्ठ उपाध्यक्ष हे झिकीले सामाजिक सञ्जालमा न्यू इनर्जी भेइकल उभयचर डुङ्गा नभएको भन्दै कडा निर्देशन जारी गरेका छन् ।

झिकीका अनुसार गाडीमा प्रयोग गरिएको ब्याट्री कम्पोनेन्टहरूले आईपी६७ र आईपी६८ सुरक्षा मापदण्ड प्राप्त गरेको र कारखानाको विशिष्टीकरणले २४ घण्टाका लागि १ मिटरसम्म डुबेर सुरक्षाको ग्यारेन्टी (विद्युतीय चुहावट वा थर्मल रनअवे नहुने) दिए तापनि, गहिरो पानीमा गाडी चलाउनु निकै जोखिमपूर्ण हुन्छ ।

बाढी प्रभावित क्षेत्रको पुनर्निर्माण र आपतकालीन उद्धार कार्यलाई तीव्रता बीवाईडीले आफ्नो च्यारिटी फाउन्डेसनमार्फत फ्रन्टलाइन आपतकालीन टोलीहरू र सार्वजनिक पूर्वाधार मर्मतका लागि एक करोड युआन सहयोग गर्ने घोषणा गरेको छ ।