नयाँ प्लेटफर्म ल्याउँदै बीवाइडी, ईभीको मूल्य कम हुने

चिनियाँ ईभी निर्माता बीवाइडीले नयाँ प्लेटफर्म ल्याउने तयारी थालेको छ । हाईब्रिड र ब्याट्री इलेक्ट्रिक दुबै भर्सनका लागी कम्पनीले नयाँ प्लेटफर्म ल्याउन लागेको हो । नयाँ प्लेटफर्म आएपछि ईभीको मूल्यमा भारी कटौती हुने अनुमान गरिएको छ ।

मिडिया रिपोर्टका अनुसार हाईब्रिड र ब्याट्री इलेक्ट्रिक दुबै भर्सनमा हाल प्रयोग हुँदै आएको डीएम–आई र ई–प्लेटफर्मलाई अद्यावधिक गर्न लागिएको हो । अद्यावधिक गरिएको डीएम–आई प्लेटफर्मले हाईब्रिड मोडलमा इन्धनको पूर्ण ट्याङ्की र पूर्ण ब्याट्री चार्जमार्फत २ हजार किलोमिटरसम्म रेन्ज पाउन सकिने आँकलन गरिएको छ ।

यसैगरी ईभी मोडलमा हाल प्रयोग हुँदै आएको ई–प्लेटफर्म ३.० लाई अपग्रेड गरी ४.० भर्सन ल्याउने तयारी कम्पनीले गरेको छ । सो नयाँ प्लेटफर्मममा थोरै तार हार्नेसहरु उपलब्ध हुने हुँदा लागत कम हुने अनुमान गरिएको छ ।

कम्पनीसंग हाल सबैभन्दा सस्तो ईभीका रुपमा सिगुल ह्याचब्याक उपलब्ध छ । जसको मूल्य १० हजार डलरभन्दा कम पर्ने जनाइएको छ । बीवाइडीले आगामी तीन वर्षमा ग्यासबाट चल्ने कारहरूको समेत बजार हिस्सा बृद्धि गर्ने योजना बनाएको छ ।