ठूलो बडी र रियर ह्विल ड्राइभ प्लेटफर्ममा आउँदै एट्टो ३

काठमाडौं–बीवाईडीको चर्चित एसयूभी एट्टो ३ ठूलो बडी र रियर ह्विल ड्राइभ प्लेटफर्मममा आउने भएको छ । चीनको उद्योग तथा सूचना प्रविधि मन्त्रालयमा गरिएको फाइलिङले यसबारे खुलासा गरेको हो ।

चीनमा युआन प्लस नामले बिक्री हुने यस एसयूभीमा नयाँ स्टाइल, ठूलो बडी र नयाँ रियर ह्विल ड्राइभ इलेक्ट्रिक प्लेटफर्म प्रयोग हुने पुष्टि भएको हो ।

नयाँ एट्टो ३ मा बीवाईडीले आफ्नो फिन ड्रिम्स ब्याट्री डिभिजनद्वारा आपूर्ति गरिएको लिथियम आइरन फस्फेट ब्याट्री प्रयोग गर्ने उल्लेख गरिएपनि ब्याट्री क्षमताबारे खुलासा गरिएको छैन । फाइलिङमा गाडीको गती १९० किलोमिटर प्रतिघण्टा रहने उल्लेख गरिएको छ ।

त्यसैगरी, ड्राइभर असिस्टेन्ट सिस्टमलाई थप प्रभावकारी बनाउन थप वैकल्पिक सेन्सर जडान गरिने बताइएको छ । नयाँ एट्टो ३ मा अबा अगाडिको रडार र फेन्डर माउन्टेड क्यामेराका साथ रुफ माउन्टेड लिडरलाई वैकल्पिक उपकरणका रुपमा राखिनेछ । ड्राइभर असिस्टेन्ट सिस्टमलाई शक्ति दिने कम्प्युटिङ प्लेटफर्मको विवरण भने स्रोतमा उल्लेख गरिएको छैन ।

नयाँ एटो ३ को लम्बाइ ४६६५ एमएम, चौडाइ १८९५ एमएम र उचाई १६७५ एमएम तथा ह्वीलबेस २७७० एमएम हुने उल्लेख गरिएको छ । नियामक फाइलिङ अनुसार, एसयूभीको कर्ब तौल १६९० किलोग्राम र कुल तौल २११५ किलोग्राम छ ।

एसयूभीको बाहिरी भागमा सिल्भर ग्रिल स्टायलको प्यानल र पातलो हेडल्याम्प युनिट सहितको पुनः डिजाइन गरिएको फ्रन्ट फेसिया उपलब्ध हुनेछ । तल्लो बम्परमा ठाडो रूपमा व्यवस्थित कुलिङ ओपनिङहरू र ट्रापेजोइडल सेन्ट्रल इन्टेक समावेश छ ।

नयाँ एट्टो ३ को रेन्ज र इन्टिेरियर फिचरबारे कुनै जानकारी बाहिर नल्याइएको भएपनि यसमा हाल उपलब्ध मोडलको तुलनामा निकै आधुनिक र सुबिधासम्पन्न क्याविन रहने अनुमान गरिएको छ । रेन्ज समेत ६०० किलोमिटर माथि रहने अपेक्षा गरिएको छ ।