२०३० सम्ममा विश्वव्यापी कार बिक्रीको ३० प्रतिशत हिस्सा चिनियाँ ब्राण्डले लिने

एक प्रतिवेदनका अनुसार २०३० सम्ममा विश्वमा बिक्री हुने सवारी साधनको कम्तीमा ३० प्रतिशत हिस्सा चिनियाँ अटोमोबाइल ब्राण्डको हुनेछ ।

प्रतिवेदनले दशकको अन्त्यसम्ममा युरोप र रुसमा चिनियाँ ब्राण्डको प्रवेश दोब्बर हुनेछ भने दक्षिणपूर्वी एसियामा तीन गुणा र मध्यपूर्व र अफ्रिकामा चौगुना हुने उल्लेख गरेको छ । मेक्सिकोमा छिट्टै २० प्रतिशत बजार हिस्सा चिनियाँ ब्राण्डले लिने जनाइएको छ ।

विश्वव्यापी बिक्रीको एक तिहाइ हिस्सा ओगट्ने प्रयास स्वपरुप चिनियाँ ब्राण्डले अहिले विश्वका विभिन्न देशमा उत्पादन यूनिट लगाइरहेको छ । चीनका प्रख्यात ब्राण्डहरु बीवाईडी, ग्रेट वाल, जीली, चेरी र एसएआईसी एमजी जस्ता ब्राण्डले अहिले मेक्सिको, ब्राजिल र युरोपमा उत्पादन प्लान्ट स्थापन गरिसकेका छन् ।

अमेरिकाले चिनियाँ ईभीमा अत्याधिक कर बृद्धि गरेपछि अहिले मेक्सिकोमा उत्पादन प्लान्ट स्थापना हुने ट्रेन्ड नै चलेको छ । मेक्सिकोमा प्लान्ट स्थापना भएपछि अमेरिकाले चिनियाँ ईभीहरूमा लागू गरेको करको कुनै अर्थ नरहने उल्लेख गरिएको छ ।

अमेरिकामा ५० हजार डलर पर्ने कारलाई अहिले चीनले ११ हजार डलरमै उपलब्ध गराउन थालिसकेको छ । निकै नै सस्तो मूल्यका कारण पनि ढिलोचाँडो अमेरिकन बजारमा पनि चिनियाँ ब्राण्डकै वर्चश्व बढ्ने देखिन्छ ।