यो वर्ष १३ लाख न्यू इनर्जी भेइकल निर्यात गर्ने बीवाईडीको लक्ष्य

बीवाईडीले २०२६ मा चीन बाहिर १३ लाख सवारी साधन बिक्री गर्ने लक्ष्य लिएको छ । कम्पनीले सांघाई मिडिया कार्यक्रममा बयान दिँदै यसबारे जानकारी दिएको हो ।

बीवाईडीको उक्त लक्ष्य सन् २०२५ मा निर्यात गरिएको कुल कारको तुलनामा २५ प्रतिशत बढि हो । यो घोषणाले गत वर्षको तीव्र वृद्धिपछि बीवाईडीको अन्तर्राष्ट्रिय विस्तारमा नयाँ बेन्चमार्क तयार हुने अपेक्षा गरिएको छ ।

बीवाईडीका ब्रान्डिङ तथा जनसम्पर्क विभागका महाप्रबन्धक ली युनफेईले २०२६ मा निर्यात १३ लाख युनिट पुग्ने बताएका हुन् । यो घोषणा शनिबार सांघाईमा भएको मिडिया ब्रीफिङका क्रममा गरिएको हो ।

बीवाईडीले २०२५ मा ४६ लाख युनिट न्यू इनर्जी भेइकल बिक्री गरेको थियो । जसमा २२ लाख ६० हजार युनिट ब्याट्री इलेक्ट्रिक भेइकल र बाँकी प्लग–इन हाइब्रिड मोडल थिए । ब्याट्री इलेक्ट्रिक चीनबाहिर धेरै निर्यात भएको थियो भने प्लग–इन–हाइब्रिड आन्तरिक बजारमा बढि खपत भएका थिए ।

त्यसैगरी, २०२५ मा प्यासेन्जर भेइकल र पिकअप ट्रकसहित १० लाख ४ हजार युनिटभन्दा बढी ईभी निर्यात भएको थियो । कम्पनीले युरोपमा आफ्नो उपस्थितीलाई मजवुट बनाउँदै ल्याटिन अमेरिका र दक्षिणपूर्व एशियामा बजार प्रवेश र बिक्रीलाई पनि तीव्र बनाएको छ । बीवाईडीका सवारीसाधन हाल विश्वका ११० भन्दा बढि देशमा विक्री हुँदै आएका छन् ।