वर्षको सुरुमै एलन मस्कलाई झड्का, बीवाईडीले बेच्यो टेस्ला भन्दा धेरै गाडी

टेस्ला मालिक एलन मस्कलाई सन् २०२४ को सुरुवातमै नराम्रो झड्का लागेको छ । चिनियाँ विद्युतीय कार निर्माता कम्पनी बीवाईडीले अमेरिकी प्रतिस्पर्धी कम्पनी टेस्लाले भन्दा धेरै विद्युतीय कार बेचेको तथ्य बाहिरिएको छ । दुई कम्पनीबिच विश्वको ईभी बजारको शीर्ष स्थानमा को रहने भन्ने होडबाजी चलिरहँदा यस्तो त्रैमासिक तथ्याङ्क बाहिरिएको हो ।

सन् २०२३ को अन्तिम तीन महिनामा बीवाईडीले संसारभरमा ब्याट्रीबाट मात्रै चल्ने ५ लाख २६ हजार ४०९ थान कार बेचेको छ । यही अवधिमा टेस्लाले भने ४ लाख ८४ हजार ५०७ युनिट कार बेचेको छ । यद्यपि यो पहिले भन्दा २० प्रतिशत बढी कार बिक्री हो । यो श्रेणीमा बीवाइडीले टेस्लालाई उछिनेको यो पहिलो त्रैमास हो ।

२०२३ भरि चाँहि बीवाईडीले भन्दा टेस्लाले धेरै विद्युतीय कार बेचेको छ । अक्टोबर–डिसेम्बर त्रैमासमा कम्पनीले ४ लाख ८४ हजार ५०० थान विद्युतीय कार बेचेको टेस्लाले मंगलबार बताएको थियो । वर्षभरिमा भने कम्पनीले १८ लाख थान विद्युतीय कार बेचेको छ ।

२०२३ भरिमा कम्पनीका २० लाख थान कार विक्री हुने अनुमान गरिएको वर्षको सुरुमा कम्पनीका सीईओ तथा संस्थापक एलन मस्कले भनेका थिए ।

वर्षभरिमा बीवाईडीले भने विद्युतीय र हाइब्रिड दुवै गरेर ३० लाख थान कार बेचेको छ ।कम्पनीले बेचेको कूलमध्ये १६ लाख थान कार विद्युतीय थिए ।

गत ८ वर्ष देखि नै बीवाईडी प्रमुख ईभी निर्माता कम्पनी बनेको छ । सन् २०१५ मा निसान लिफलाई पछि पारेर टेस्लाले यो स्थान हासिल गरेको थियो ।