बेइजिङ अटो शोमा ग्लोबल डेब्यु गर्दै बीवाईडी शार्क पिकअप

बीवाईडीको नयाँ पिकअप ट्रकको नाम शार्क हुने र आगामी अप्रिल २५ देखि शुरु हुने बेइजिङ अटो शो २०२४ मा ग्लोबल डेब्यु गर्ने भएको छ ।

लिक भएको तस्बिरका आधारमा बीवाईडी शार्क पिकअप रग्ड डिजाइन सहितको बक्सी लुक छ र ग्लोबल रुपमा बिक्री भइरहेको फोर्ड रेन्जर पिकअप जस्तो देखिन्छ ।

बीवाईडीले ‘ओसन सिरिज’ अन्तर्गत ल्याएका अन्य मोडल जस्तै पिकअपको नाम पनि त्यही अनुसार शार्क राखिएको हो । यस अन्तर्गत बीवाईडीले सिल सेडान, सिल यू एसयूभी र डल्फिन ह्याचब्याक समेत पहिले नै उपलब्ध गराइसकेको छ ।

नाम बाहेक बीवाईडीले डीएमओ अर्थात ड्युअल मोड अफरोड नामक नयाँ प्लग–इन हाइब्रिड पावरट्रेन समेत सार्वजनिक गर्ने बताएको छ । यसले अफरोड पर्फमेन्स बढाउने छ । पावरट्रेन बाहेक यसको अन्य टेक्निकल स्पेसिफिकेसन सार्वजनिक नभए पनि यसमा फोर ह्विल ड्राइभ हुने र टोयोटा हाइलक्स जस्ता आईसीई भेइकल जस्तै पर्फमेन्स हुने अनुमान गरिएको छ ।