लन्च भएको एक घन्टामै १ हजार बढी बीवाईडी सील बिक्री

बीवाइडीले आज थाइल्यान्डमा आफ्नो लोकप्रिय इलेक्ट्रिक कार सील लन्च गरेको छ । सो कार लन्च भएको एक घन्टा नवित्दै १ हजार १०४ युनिट बिक्री भएको कम्पनीले जनाएको छ । जसमध्ये ३९ जनालाई तत्कालै कार हस्तान्तरण गरिएको थियो ।

सो नयाँ कारलाई बीवाइडीले थाइल्यान्डमा तीनवटा ट्रिममा उपलब्ध गराएको छ । नेपालमा जस्तै थाइल्यान्डमा पनि राइट ह्यान्ड ड्राइभ सिस्टम भएका कारण कम्पनीले यसलाई चीनमा लन्च गरे लगत्तै निर्यात गर्न सकेको थिएन ।

थाइल्यान्डमा लन्च भएसंगै यो नयाँ कार नेपाल आउने बाटो समेत खुलेको अनुमान गर्न सकिन्छ । नेपालमा हालै सम्पन्न नाडा अटो शोमा प्रदर्शनीका लागि ल्याइएको सीलमा दर्शकले अत्याधिक रुची राखेका थिए । मेलामा यस कार बारे जिज्ञासा राख्ने ग्राहकलाई आधिकारिक वितरक साइमेक्स इंकले छिट्टै बिक्री शुरु हुने बताएको थियो ।

बीवाइडीको ई–प्लेटफर्म ३.० आर्किटेक्चरमा निर्माण भएको सील ४८०० मिलिमिटर लम्बाई, १८७५ मिलिमिटर चौडाई, १४६० मिलिमिटर उचाई र २९२० मिलिमिटर ह्विलबेश भएको प्रिमियम सेडान कार हो । यसको इन्ट्रि लेभल भेरिएन्टमा बीवाइडीले ६१.४ किलोवाट आवरको एलएफपी ब्लेड ब्याट्री दिएको छ भने अर्को भेरिएन्टमा ८२.५ किलोवाट आवरको ब्याट्री प्याक राखिएको छ । सोही क्षमताको ब्याट्री प्याकमा डवल मोटर दिएर यसको अर्को भेरिएन्ट समेत उपलब्ध छ ।

सीलको इन्ट्री लेभल भेरिएन्टले सिंगल चार्जमा ५१० किलोमिटर रेन्ज दिने दावी गरिएको छ भने लङ रेन्ज भेरिएन्टले ६५० किलोमिटर र डवल मोटर जडित अर्को पावरफुल भेरिएन्टले ५८० किलोमिटर दिने दाबी छ । थाइल्यान्डमा यसको मूल्य ३६ हजार २०० देखी ४३ हजार ७०० डलरसम्म कायम गरिएको छ ।