१० लाख कार निर्यातको लक्ष्य पुरा गर्दै बीवाईडी, प्रमुख ११ अटोमोटिभ बजारमा टेस्लालाई उछिन्यो

बीवाईडीले २०२५ मा १० लाख सवारी साधन निर्यात गर्ने महत्वपूर्ण माइलस्टोन पुरा गर्न लागेको छ । पछिल्लो उद्योग तथ्याङ्क अनुसार, बीवाईडीको प्यासेन्जर कार निर्यात नोभेम्बर २०२५ मा १ लाख २८ हजार ६७ यूनिट पुगेको छ, जुन गत वर्षको सोहि अवधीको तुलनामा ३१३.४ प्रतिशतको नाटकीय वृद्धि हो । साथै कम्पनीले गत सेप्टेम्वरको तुलनमा ५९.९ प्रतिशतभन्दा बढि निर्यात दर हाँसिल गरेको छ ।

जनवरी देखि नोभेम्बर २०२५ सम्म बीवाईडीले ८ लाख ७८ हजार ४९८ सवारी साधन निर्यात गरिसकेको छ, जुन गत वर्षको सोही अवधिको तुलनामा १४४ प्रतिशले बढि हो ।

चेरीले नोभेम्बरमा १ लाख ३५ हजार १९० यूनिट कार निर्यात गरेर चीनको अग्रणी निर्यातकर्ताको रूपमा आफ्नो स्थान कायम राख्न सफल भएपनि बीवाईडीले उसंगको अन्तरलाई घटाएर कडा चुनौती दिइरहेको रिपोर्टमा उल्लेख गरिएको छ ।

बीवाईडीले घरेलु बजार चीनसहित ब्राजिल, टर्की, इटाली, स्पेन, हंगेरी, सिंगापुर र क्रोएसियामा न्यू इनर्जी भेइकलको बिक्रीमा नेतृत्व लिन सफल भएको छ ।
२०२५ को पहिलो एघार महिनाको बिक्रीलाई आधार मान्दा बीवाईडीले ब्राजिल, टर्की, स्पेन र इटालीमा न्यू इनर्जी भेइकल सेग्मेन्टमा नेतृत्व गरिरहेको देखाउँछ, जबकि सिंगापुर र हङकङमा समग्र ब्रान्ड बिक्रीमै उसले नेतृत्व हासिल गरिरहेको छ ।

त्यसैगरी, बीवाईडीका उत्पादनले २०२५ मा प्रमुख ११ वटा अटोमोटिभ बजारमा टेस्लालाई उछिनेको छ, जसमा बेलायत, जर्मनी, इटाली, स्पेन, अस्ट्रिया र आयरल्याण्ड जस्ता प्रमुख युरोपेली देशहरु पर्छन् । साथै मलेसिया, टर्की, सिंगापुर, थाइल्याण्ड र चीन लगायतका एशियाली बजारमा बीवाईडीको दवदबा बढ्दै गएको छ ।