बीवाइडीको नयाँ हाईब्रिड टेक्नोलोजी, २.९ लिटर पेट्रोल खपतमा १०० किलोमिटर माइलेज

काठमाडौं–बीवाईडीले आफ्नो प्लग–इन हाइब्रिड टेक्नोलोजीको नयाँ भर्सन सार्वजनिक गरेको छ । कम्पनीले हालै हाइब्रिड टेक्नोलोजी ‘डुअल मोड’(डिएम) को पाँचौं जेनेरेशन सार्वजनिक गरेको हो । उक्त प्रबिधी प्रयोग गरेर कम्पनीले क्विन एल र सील ०६ मोडलका दुईवटा कार समेत ल्याएको छ ।

यी दुबै कारमा १.५ लिटर क्षमताको प्लग–इन–हाइब्रिड पेट्रोल ईन्जिन जडान गरिएको छ । साथै कारमा १०.०८ र १५.८७ किलोवाट आवर अप्सनमा बीवाईडी ब्लेड ब्याट्रीको अप्सन दिइएको छ । यसमा जडान गरिएको इलेक्ट्रिक मोटरले १६० किलोवाट पावर र २६० एनएम टर्क जेनेरेट गर्दछ भने इन्जिनको पावर ७४ किलोवाट तथा टर्क १२६ एनएम छ ।

कम्पनीका अनुसार सो नयाँ प्रविधि प्रयोग गरिएको गाडीलाई २.९ लिटर इन्धन खर्च गरेर १०० किलोमिटर यात्रा गरिएको थियो । ब्याट्रीलाई पुरा चार्ज गर्दा र फुल ट्यांक तेल हालेर चलाउँदा यसको समग्र रेन्ज २१०० किलोमिटर रहेको कम्पनी दावी छ ।

बीवाइडीको यो नयाँ प्रबिधीले हाइब्रिड टेक्नोलोजी जायन्ट टोयोटासंग कडा प्रतिस्पर्धा गर्ने अनुमान गरिएको छ । प्लग–इन हाइब्रिड टेक्नोलोजी उपलब्ध गाडीलाई पेट्रोल इन्जिनसँगै रिचार्जेबल ब्याट्रीबाट चलाउन सकिन्छ । यसले गाडीको इन्धन खपतमा सुधार गर्ने तथा मूल्य बचत गर्न मद्धत गर्दछ ।