नयाँ हाइब्रिड सेडान ल्याउँदै बीवाइडी, इलेक्ट्रिक रेन्ज नै ९० किलोमिटर

विश्वको सबैभन्दा ठूलो न्यू इनर्जी भेइकल उत्पादक बीवाइडीले नयाँ हाइब्रिड सेडान ल्याउने भएको छ । क्विन एल नामले आउने तयारीमा रहेको सो नयाँ सेडानमा १.५ लिटर क्षमताको इन्जिन जडान हुनेछ । जसको पावर ७४ किलोवाट हुनेछ भने इलेक्ट्रिक मोटरले १६० किलोवाटसम्म पावर जेनेरेट गर्न सक्ने जनाइएको छ ।

सो नयाँ कार १६ र १० किलोवाट आवरको ब्याट्री प्याक अप्सनमा उपलब्ध हुनेछ । जसमध्ये १६ किलोवाट आवरको ब्याट्रीले ९० किलोमिटर र १० किलोवाट आवरको प्याकले ६० किलोमिटर इलेक्ट्रिक रेन्ज दिने दावी गरिएको छ । कारको मूल्य १६ हजार ७०० डलर पर्ने अनुमान गरिएको छ ।

कारको डिजाइन बीवाईडी हानबाट प्रेरित हुने बताइएको छ । कारमा ठूलो आकारको बम्पर, सेन्ट्रल टचस्क्रिन, वायरलेस चार्जर र बीवाईडीको नयाँ इन्फोटेन्मेन्ट सिस्टम लगायत फिचरहरु उपलब्ध हुनेछ । सो नयाँ कार हाल उपलब्ध क्विन प्लस मोडलको तुलनामा केही ठूलो र आरामदायी समेत हुनेछ ।

बीवाइडीले हाल प्योर इलेक्ट्रिकको साथै प्लग–इन–हाइब्रिड मोडलका कार उत्पादन गरी विश्व बजारमा निर्यात गर्दै आएको छ । सन् २०२३ मा कम्पनीले क्लिन प्लस हाइब्रिड मोडल ४ लाख ८२ हजार यूनिट बिक्री गरेको थियो ।