बीवाईडीको सबैभन्दा महंगो कार ३० युनिटमात्र उत्पादन हुने, मूल्य कति ?

बीवाईडीले आफ्नो सबैभन्दा महंगो मोडल याङवाङ यू९ इलेक्ट्रिक सुपर कारलाई प्रति युनिट २७ लाख ६० हजार डलरमा बिक्री गरेको छ । जुन नेपाली रुपैयाँ ४२ करोड हाराहारी पर्न आउँछ ।

हालै सम्पन्न बेइजिङ अटो शोमा यो कार यति धेरै मूल्यमा बिक्री भएको हो । जसले गर्दा यसलाई सबैभन्दा उच्च मूल्यको बीवाईडी मोडल बनाएको छ ।

बीवाईडी समूहका ब्रान्डिङ र जनसम्पर्क महाप्रबन्धक ली युनफेईले यू९ एक्सट्रिम अटो शोको समयमा बेचिएको सबैभन्दा महँगो मोडल भएको बताए ।

यो गाडी विश्वव्यापी रूपमा ३० युनिट मात्र उपलब्ध हुने जनाइएको छ । कार्यक्रममा एक युनिट यू९ मात्र बिक्री गरिएको र जसलाई बीवाइडीका अध्यक्ष वाङ चुआनफुले व्यक्तिगत रूपमा कार हस्तान्तरण गरेका थिए ।

याङवाङ यू९ मा ३ हजार हर्षपावरभन्दा बढी क्षमता भएको इलेक्ट्रिक मोटर जडान गरिएको छ । १२०० भोल्टको इलेक्ट्रिक आर्किटेक्चरमा तयार पारिएको यस कारमा बीवाईडीको डिसस–एक्स सस्पेन्सन सिस्टम र कार्बन–सिरेमिक डिस्क सहित रेनफोर्सड ब्रेकिङ कम्पोनेन्टहरू प्रयोग गरिएको छ ।