विश्वकै टप १० अटोमोबाइल ब्रान्डमा सामेल भयो बीवाईडी, ६ महिनामा बेच्यो साढे १२ लाख गाडी

चिनियाँ गाडी उत्पादक कम्पनी बीवाईडी विश्वकै टप १० अटोमोबाइल ब्रान्डमा सामेल भएको छ । बीवाईडीले मर्सिडिज बेन्ज समूह र बिएमडब्ल्युलाई पनि पछि पार्दै शीर्ष १० ठूला कार उत्पादक कम्पनीहरुमा सामेल भएको हो ।

नवीकरणीय उर्जामा आधारित गाडी (न्यु इनर्जी भेइकल) बनाउने बीवाईडीले सन् २०२३ को पहिलो ६ महिनामा गत वर्षको भन्दा ९६ प्रतिशत धेरै गाडी बिक्री पनि गरेको छ । कम्पनीले यो अवधिमा १२.५ लाख गाडी बिक्री गर्दै शीर्ष १०औं स्थानमा सामेल भएको हो ।

बीवाईडीले गत महिना अर्थात अगस्ट २०२३ मा २ लाख ७४ हजार ३८६ गाडीहरु बिक्री गरेको छ । लगातार चौथो महिनामा बीवाईडीले आफ्नै रेकर्ड तोड्दै अगस्टमा यति गाडीहरु बिक्री गरेको हो । २०२३ को पहिलो ६ महिनामा बीवाईडीको बिक्री पनि ७२.७२ प्रतिशतले बृद्धि भएको छ ।

कम्पनीले यो अवधिमा ३५ अर्ब ६६ करोड अमेरिकी डलर बराबरको व्यापार गरेको छ । बीवाईडी सन् १९९५ मा स्थापित चिनियाँ कम्पनी हो, जसले सुरुवातमा रिचार्ज हुने ब्याट्रीहरुको उत्पादन गर्ने गरेको थियो । जापानबाट चीनमा आयात हुने ब्याट्रीहरुलाई विस्थापित गर्न प्रतिस्पर्धि बनेर आएको बीवाईडीले सन् २००२ बाट गाडीसँग सम्बन्धित कुराहरुको निर्माण गर्न सुरु गरेको थियो ।

सन् २०२२ अप्रिलबाट भने कम्पनीले कम्बसन इञ्जिन गाडीहरुको उत्पादन बन्द गर्ने र विद्युतीय गाडीमा मात्रै केन्द्रित हुने घोषणा गरेको थियो ।

नेपालमा पनि बीवाईडीका गाडी बिक्रीका लागि उपलब्ध छन् । साइमेक्स इंकले बीवाईडीका गाडी बिक्री–वितरण गरिरहेको छ ।