१० लाख युनिट बिक्री भयो बीवाईडी डल्फिन, नेपाली बजारमा लोकप्रिय बन्दै

काठमाडौं– बीवाईडीको लोकप्रिय ह्याचब्याक कार डल्फिनले १० लाख युनिट बिक्रीको माइलस्टोन हाँसिल गरेको छ । सन् २०२१ अगष्टमा लन्च भएयता डल्फिनले प्रिमियम विद्युतिय ह्याचब्याक कारमा निकै राम्रो बजार पाइरहेको छ ।

४ वर्षमै १० लाख युनिट बिक्री पाएको डल्फिन छोटो समयमै सर्बाधिक बिक्री हुने बीवाईडीको पहिलो मोडल समेत हो । हाल चिनियाँ बजारमा यसको २०२५ मोडल बिक्री भइरहेको छ ।

बीवाईडीको ई–प्लेटफर्म ३.० मा तयार पारिएको डल्फिनमा ४५ र ६० किलोवाट आवर क्षमताको ब्याट्री अप्सन तथा ७० किलोवाट क्षमताको मोटर जडान गरिएको छ ।

फास्ट चार्जर समेत सपोर्ट गर्ने यस ईभीलाई ३० मिनेटमै ३० देखी ८० प्रतिशतसम्म चार्ज गर्न सकिन्छ । फुल चार्जमा यसले ३४० किलोमिटर रेन्ज प्रदान गर्दछ ।

कारमा ५ इन्चको डिजिटल इन्स्ट्रुमेन्ट क्लस्टर र १०.१ इन्च वा १२.८ इन्चको सेन्ट्रल कन्ट्रोल स्क्रिन रहेको छ । साथै, अपरेटिङ सिस्टमका रुपमा यसमा बीवाईडीको आफ्नै डिलिंक पाउन सकिन्छ । कारमा ५० वाट क्षमताको वायरलेस फोन चार्जर समेत उपलब्ध गराइएको छ ।

डल्फिन नेपाली बजारमा समेत निकै राम्रो चर्चा पाएको कार हो । विद्युतिय ह्याचब्याक सेग्मेन्टमा प्रिमियम श्रेणीको यस कारको मूल्य ४१ लाख १५ हजार रुपैयाँ निर्धारण गरिएको छ । बीवाईडीको नेपालका लागि आधिकारिक वितरक साइमेक्स इंक प्रालिले बिक्री गर्दै आएको डल्फिन हालसम्म २ हजार ५०० युनिट हाराहारी बिक्री भएको छ ।