बीवाईडीको ब्राजिल प्लान्टले अर्जेन्टिना र मेक्सिकोबाट पायो १ लाख युनिट अर्डर

काठमाडौं–बीवाईडीको ब्राजिल प्लान्टले सञ्चालनमा आएको छोटो अबधीमै अजेन्टिना र मेक्सिकोबाट ठूलो अर्डर प्राप्त गरेको छ । बीवाईडीले ल्याटिन अमेरिकामा प्रगती गरिरहेको र अर्जेन्टिना तथा मेक्सिकोबाट १ लाख सवारीसाधनको अर्डर प्राप्त गरेको कम्पनीकी कार्यकारी उपाध्यक्ष स्टेला लीले बताएकी हुन् ।

बीवाईडीको ब्राजिल प्लान्ट जुलाई १, २०२५ देखी आधिकारिक रूपमा सञ्चालनमा आएको थियो । चिनियाँ मिडिया जाओबाओले उद्धृत गरेको रोयटर्सको रिपोर्ट अनुसार, अर्डर समान रूपमा विभाजित गरिएको छ । जसमा ५० हजार सवारी साधन अर्जेन्टिनाको लागि तोकिएको छ र अर्को ५० हजार सवारी साधन मेक्सिकोको लागि तोकिएको छ ।

बीवाईडीको ब्राजिल प्लान्टले वार्षिक १ लाख ५० हजार सवारीसाधन उत्पादन गर्ने क्षमता राख्दछ । जसलाई चरणबद्ध रूपमा बढाएर वार्षिक ६ लाख पुर्याउने लक्ष्य लिइएको छ । कम्पनीले हाल डल्फिन, किङ र सोङ प्रो सहित प्लग–इन हाइब्रिड र पूर्ण विद्युतीय सवारी साधन दुवै निर्माण गर्नेछ ।

ब्राजिलको राष्ट्रिय अटोमोटिभ डिलर्स संघका अनुसार बीवाईडीले गत वर्ष ब्राजिलमा १ लाख १३ हजार सवारी साधन बिक्री गर्दै चीन बाहिर कम्पनीको सबैभन्दा ठूलो बजार बनेको थियो । कम्पनीले ५३ मिलियन अमेरिकी डलर लगानी गरेर रियो दि जेनेरियोमा अनुसन्धान केन्द्र निर्माण गर्ने घोषणा समेत गरेको छ ।