साङयोङ, टोयोटा र टेस्लाले बीवाईडीको ब्याट्री प्रविधि प्रयोग गर्ने, नेपालमा पनि आउने

चीनको नम्बर १ इलेक्ट्रिक भेइकल निर्माता कम्पनी बीवाईडीले विश्वका प्रतिष्ठित कार निर्माता कम्पनीहरुको इलेक्ट्रिक कार उत्पादनको लागि आफ्नो ब्याट्री प्रविधिमा भएको विशेषज्ञतामार्फत सहयोग गरिरहेको छ ।

पछिल्लो समयमा दक्षिण कोरियाली कार निर्माता कम्पनी साङयोङ बनेको छ बीवाईडीको सहकर्मी । हालै साङयोङले एक सार्वजनिक जानकारीमार्फत यो कुराको खुलासा गरेको छ । बीवाईडीले ब्याट्री उत्पादनका लागि बनाएको छुट्टै ‘फिनड्रिम्स इन्डष्ट्री’ ले यस कार्यमा सहकार्य गर्नेछ । सन् २०२० को मार्चमा लन्च गरिएको फिनड्रिम्सले इको–फ्रेन्ड्ली इलेक्ट्रिक भेइकलका लागि कोर कम्पोनेन्ट प्रोडक्सनका लागि विशेषज्ञ सेवा उपलब्ध गराउने बताइएको छ ।

साङयोङ र बीवाईडी मिलेर विकास गरिने ब्याट्री साङयोङको यु१०० ईभीमा उपयोग गरिने छ । यु१०० ईभी सन् २०२३ मा बिक्रीका लागि उपलब्ध गराउने कम्पनीको योजना छ । यो सहकार्यबाट अझै छोटो समयमै सो इलेक्ट्रिक भेइकल बजारमा ल्याउन समेत सहयोग पुग्ने कम्पनीले विश्वास गरेको छ ।

यो भन्दा रोयटर्सले सार्वजनिक गरेको जानकारी अनुसार टोयोटाले समेत सन् २०२२ मा चीनमा सानो इलेक्ट्रिक सेडान उत्पादनका लागि बीवाईडीसँग सहकार्य गरेको छ । यसबाट कम मूल्यमै इलेक्ट्रिक सवारी साधन उत्पादन गर्न सहयोग पुग्ने अपेक्षा गरिएको छ ।

टोयोटाका करिव दुई दर्जन इन्जिनियरहरुले १०० बीवाईडी सहकर्मीका साथ कार्य गरिरहेको समेत रोयटर्सले उल्लेख गरेको छ । सन् २०२० मा टोयोटाले बीवाईडीसँग मिलेर चीनमा ब्याट्री ज्वाइन्ट भेन्चरको स्थापना गरेको छ ।

त्यसैगरी टेस्लाले समेत १ लाख ६० हजार सवारी साधनमा ब्लेड ब्याट्री प्रयोग गर्नका लागि सम्झौता गरिसकेको छ ।

बीवाईडीको कम वजनयुक्त लिथियम आइरन फस्फेट ब्लेड ब्याट्री पछिल्लो समयमा लोकप्रिय बनिरहेको छ । यसलाई ब्याट्री प्याकमा ब्लेड जसरी मिलाएर राख्न सकिन्छ । परम्परागत लिथियम आयोन ब्याट्री भन्दा यो बढी सुरक्षित हुनुका साथै लामो रेन्ज दिने र टिकाउ समेत हुन्छ ।

बीवाईडीको स्थापना सन् १९९५ मा भएको थियो । शुरुमा ब्याट्री व्यवसायका लागि स्थापना भएको बीवाईडी पछि इनर्जी सोलुसन कम्पनीको रुपमा विकास भएको थियो । सन् २००८ मा यो विश्वकै पहिलो मास–प्रोड्युस्ड प्लग–इन–हाइब्रिड इलेक्ट्रिक भेइकल बिक्री गर्ने कम्पनी बन्यो ।

हाल बीवाईडी चीनको बेस्ट सेलिङ न्यु इनर्जी भेइकल मेकर बनेको छ । चाइना एसोसिएसन अफ अटोमोबाइल म्यानुफ्याक्चरर्सका अनुसार बीवाईडीले गत नोभेम्बरमा ९० हजार युनिट यस्ता सवारी साधन बिक्री ग-यो ।

ब्याट्री उत्पादनका लागि स्वतन्त्र ब्रान्ड फिनड्रिम्सको स्थापनाले कम्पनीलाई झनै फाइदामा पु¥याउने अपेक्षा गरिएको छ । अब बीवाईडी विश्वकै सबैभन्दा ठूलो ब्याट्री निर्माता कम्पनी समेत बनेको छ । एसएनई रिसर्चका अनुसार पावर ब्याट्री इन्स्टल क्षमताको आधारमा गत अक्टोबरमा यो चौथो स्थानमा रहेको छ ।

यो वर्षको सुरुवातमा बीवाईडीले देश वाहिर युरोपमा रहेको पहिलो प्लान्टका लागि इन्जिनियरहरु नियुक्त गरेको थियो । यद्यपि यसको स्थान र क्षमता तथा अन्य विस्तृत जानकारी भने अझै सार्वजनिक गरिएको छैन ।

अहिले नेपाली बजारमा पहिले देखि नै उपलब्ध ई६, नयाँ जेनेरेसन ई६, ५ सिटर र ७ सिटर एम–थ्री एमपीभी र टी३ कार्गो भ्यान विक्री गर्दै आएको छ । यी सवारी साधनको मूल्य क्रमशः ५० लाख, ५७ लाख ५० हजार, ४३ लाख, ४६ लाख र ३८ लाख रुपैयाँ छ । यी सबै मोडलका साथ ७ किलोवाटको होम चार्जर समेत उपलब्ध हुन्छ ।

नेपाली बजारमा हालै उपलब्ध इलेक्ट्रिक कार ई६ मा यही प्रविधिको ब्लेड ब्याट्री प्रयोग गरिएको छ । नेपाली बजारमा बीवाईडीका सवारी साधन बिक्री भएको ५ वर्ष पुगेको छ । विभिन्न सरकारी निकायले समेत बीवाईडीका सवारी साधन प्रयोग गरिरहेको र लोकप्रिय ब्रान्ड भए तापनि यसको बिक्रीलाई अझै बढाउनका लागि कम्पनीले विभिन्न योजनाहरु बनाइरहेको र आगामी दिनमा थप सवारी साधन समेत भित्र्याउने बताएको छ ।

साइमेक्स इंककी प्रबन्ध निर्देशक यमुना श्रेष्ठका अनुसार केही महिना भित्रै देशभरका १० स्थानमा सर्भिस सेन्टरसहितको सोरुम बन्ने छ । यी स्थानमा चार्जिङ स्टेशन समेत बन्ने छन् । नेपाली बजारमा साइमेक्स इंकले बीवाईडीका सवारी साधन बिक्री–वितरण गरिरहेको छ ।