बीवईडी एट्टो३ को नयाँ भेरिएन्ट सार्बजनिक, रेन्ज, पावर र चार्जिङमा व्यापक सुधार

बीवाईडीले आफ्नो सर्बाधिक लोकप्रिय मोडल एट्टो३ मा ठूलो साइजको ब्याट्री दिएर नयाँ भेरिएन्ट सार्बजनिक गरेको छ । कम्पनीले अन्तर्राष्ट्रिय बजारमा ‘ईभो’ नामक एट्टो३ इलेक्ट्रिक एसयुभीको नयाँ भेरियन्ट प्रस्तुत गरेको हो ।

ठूलो ब्याट्री प्याकका साथ उपलब्ध गराइएको यस भेरिटले स्ट्यान्डर्ड भर्सनको तुलनामा धेरै रेन्ज प्रदान गर्ने जनाइएको छ । सो नयाँ भेरिएन्टमा बीवाईडीले ७८.४ किलोवाट आवर क्षमताको ब्याट्री प्याक उपलब्ध गराएको छ । जुन हाल बिक्री हुँदै आएको यसको स्ट्यान्डर्ड भर्सनको तुलनामा १४.३ किलोवाट आवर बढि हो ।

एट्टो३ को स्ट्यान्डर्ड भर्सनमा ६०.५ किलोवाट आवर क्षमताको ब्याट्री प्याक जडान गरिएको छ । ब्याट्री साइज ठूलो भएसंगै नयाँ भेरिएन्टको रेन्ज समेत ९० किलोमिटरले बढेर ५१० किलोमिटर पुगेको कम्पनी दाबी छ ।

एट्टो३ ईभोलाई पावर दिन पछाडि माउन्ट गरिएको इलेक्ट्रिक मोटर जडान गरिएको छ, जसले ३०९ बिएचपी र ३८० एनएम टर्क जेनेरेट गर्दछ । यो पुरानो फ्रन्ट–ह्वील ड्राइभ संस्करण भन्दा १०८ बिएचपी बढी हो । यसले ईभीलाई ५.५ सेकेन्डमा ०–१०० किमी/घण्टाको गति बढाउन सक्षम बनाउँछ भने उच्चतम गति १८० किमी/घण्टा छ ।

एटो ३ इभोलाई बीवाईडीले डुअल–मोटर कन्फिगरेसनमा समेत उपलब्ध गराएको छ । साथै, यसको अल–ह्विल–ड्राइभ भेरिएन्टले ४४३ बिएचपी र ५६० एनएम टर्क जनेरेट गर्दछ । यसले केवल ३.९ सेकेन्डमा ०–१०० किमी/घण्टाको गति लिन सक्ने दाबी गरिएको छ । यस भेरिएन्टको रेन्ज ४७० किलोमिटर रहने डब्लुएलटिपीले प्रमाणित गरेको छ ।

एट्टो३ ईभोलाई बीवाईडीले आफ्नो ८०० भोल्ट आर्किटेक्चरमा तयार पारेको हो । जसका कारण यसको चार्जिङ समयमा समेत ब्यापक परिमार्जन भएको छ । स्ट्यान्डर्ड भर्सनमा यसअघि ३०–८० प्रतिशत चार्ज गर्न २९ मिनेट लाग्नेमा अव घटेर २५ मिनेटमै १०–८० प्रतिशत चार्ज गर्न सकिन्छ ।