जापानमा चाइनिज ईभीको लोकप्रियता वारे सेमिनार, चर्चाको केन्द्रमा बीवाईडी एट्टो ३

सन् २००० को सुरुवाती अवस्थामा अहिले जस्तो इलेक्ट्रिक गाडी अर्थात ईभीको चर्चा धेरै थिएन । तर पनि केही मोडल बजारमा आएका थिए र इलेक्ट्रिक तथा इलेक्ट्रिफाइड भेइकलको संसारमा जापानले विश्वमै नेतृत्व गरिरहेको थियो ।

तर अहिले परिस्थिति फेरिएको छ । चीन निर्विवाद रुपमा विश्व ग्लोबल ईभी लिडर बनेको छ । यही कुरालाई मनन गरी हालै सेन्ट्रल जापान इकोनोमिक एन्ड ट्रेड ब्युरोले आयोजना गरेको सेमिनारमा कसरी जापान भन्दा अन्य देश ईभी लिडर बन्ने क्रममा अगाडि बढे भनेर गरिएको चर्चा सार्वजनिक भएको छ ।

अन्य कुराका अतिरिक्त सो अवसरमा बीवाईडी एट्टो ३ को चर्चा अलि बढी नै भयो । यसको साइज र स्पेसिफिकेसनले कसरी सबैको पहुँच हुन सक्ने ईभीको रुपमा बीवाईडी एट्टो ३ लोकप्रिय बन्यो भन्ने वारेमा खुलेरै चर्चा भयो ।

नेपाली बजारमा समेत उपलब्ध बीवाईडी एट्टो ३ लाई चीनमा युआन प्लस नाम दिइएको छ । यसको मूल्य १ लाख ३९ हजार ८ सय युआन अर्थात करिव २० हजार डलर भन्दा कम नै पर्छ ।

नेपालमा पनि बीवाईडी एट्टो ३ एड्भान्स्ड र सुपेरियर गरी दुई भेरिएन्टमा उपलब्ध छ । यसको मूल्य क्रमशः ५६ लाख ९० हजार र ६७ लाख ८० हजार रुपैयाँ छ ।

बीवाईडी एट्टो ३ एड्भान्स्डमा ४९.९२ किलोवाट आवरको ब्याट्री छ र यसले सिंगल चार्जमा ३४५ किलोमिटर (ढब्लुएलटीपी) रेन्ज दिन्छ भने सुपेरियरमा ६०.४८ किलोवाट आवरको ब्याट्री छ र यसले सिंगल चार्जमा ४२० किलोमिटर (डब्लुएलटीपी) रेन्ज दिन्छ । विश्व बजारमा ५१० किलोमिटर सम्म रेन्ज दिने बीवाईडी एट्टो ३ समेत उपलब्ध छ ।

रोचक पक्ष के छ भने चीनमा भन्दा अन्य देशमा बिक्री हुने बीवाईडी ईभीको मूल्य करिव दोब्बर वा त्यो भन्दा बढी नै हुन्छ । विभिन्न देशमा लग्ने कर र यातायात खर्चका कारण त्यसो हुन्छ भने चीनमा दिइने सरकारी अनुदानले पनि यसमा भूमिका खेलेको हुन्छ ।

उक्त सेमिनारमा बीवाईडीका विभिन्न मोडल ईभीको बनावट र यसका अन्य पक्षका वारेमा समेत चर्चा भएको थियो । यी ईभीको मूल्य कम गराउनका लागि बीवाईडीले कस्तो प्रविधि प्रयोग गरेको छ भन्ने वारेमा चर्चा भयो । बीवाईडीले कुनै पनि सवारी साधनका लागि आवश्यक पार्ट्स ईन–हाउसमै उत्पादन गर्ने र त्यसलाई एकीकृत रुपमा प्रयोग गर्ने गरेको वारेमा धेरैको सहमति रहेको थियो ।

बीवाईडीले प्रयोग गरेको भनिएको ‘ई–एक्सल’ को वारेमा त्यहाँ चर्चा गरियो । यसममा विभिन्न ८ फरक कम्पोनेन्ट रहेका हुन्छन् । यसमा मोटर, इन्भर्टर, ट्रान्समिसन र कन्ट्रोलर मात्र नभई अनबोर्ड एसी चार्जर, डीसी–टु–डीसी कन्भर्टर र ब्याट्री मोनिटरिङ सिस्टम –बीएमएस) समेत समावेश हुन्छ । यसकारण नै जति धेरै संख्यामा कार उत्पादन गरिन्छ, त्यति नै मूल्य पनि कम हुन्छ भन्ने ‘इकोनोमिज अफ स्केल’ लागू भएको हुन्छ र चाइनिज गाडी यति कम मूल्यमा उपलब्ध हुन सकेको हो भनिएको छ ।

यसकाक लागि बीवाईडी एट्टो ३ लाई नै किन रोजियो भन्ने वारेमा समेत चासो हुन सक्छ । बीवाईडीकै अन्य मोडल वा कुनै पनि चाइनिज ईभी ब्रान्डलाई पनि लिन सकिन्थ्यो । तर बीवाईडी एट्टो ३ समेत अन्तर्राष्ट्रिय रुपमा सफल मोडल बनेको र यसले सन् २०२३ को ‘जापान ईभी अफ द इयर’ अवार्ड समेत प्राप्त गरेकोले सो मोडललाई आधार मानिएको बताइएको छ ।

सो सेमिनारमा सहभागी सान्यो ट्रेडिङका डाइरेक्टर केनिची इटोले चाइनिज कार निर्माता कम्पनीहरुले लो–कस्ट प्रोडक्सन अर्थात कम मूल्यमा सवारी उत्पादन गर्ने र गुणस्तर सम्बन्धी उनीहरुको दृष्टिकोण जापानी उत्पादक भन्दा फरक भएको बताए ।

सन् २०२२ को फेब्रुअरीमा उत्पादन प्रारम्भ भए पश्चात पहिलो वर्षमै बीवाईडीले ३ लाख बीवाईडी एट्टो ३ बिक्री गरेको थियो ।