५० किलोवाट आवरको ब्याट्री प्याक भएको बीवाईडी एट्टो ३ भित्रियो, अवलोकन र टेस्ट ड्राइभ गर्न सकिने

काठमाडौं – बीवाईडीको नेपालका लागि आधिकारिक वितरक साइमेक्स इंकले ५० किलोवाट क्षमताको ब्याट्री भएको एट्टो ३ अर्थात एट्टो ३ एड्भान्स्ड नेपाल भित्र्याएको छ ।

केही दिन पहिले देखि नै बुकिङ खुला गरिएको सो इलेक्ट्रिक कारको वारेमा धेरैले चासो गरिरहेका थिए ।

नयाँ मोडलको रुपमा ४९.९२ किलोवाट आवरको ब्याट्री प्याकयुक्त एट्टो ३ को मूल्य ५५ लाख ९९ हजार रुपैयाँ तोकिएको छ । यसमा १०० किलोवाट क्षमताको मोटर नै छ ।

नेपाली बजारमा पहिले देखि नै ६०.४८ किलोवाट आवरको ब्याट्री प्याकयुक्त एट्टो ३ छ । यसमा १०० किलोवाटको मोटर नै छ भने यसको मूल्य ६५ लाख ८८ हजार रुपैयाँ तोकिएको छ ।

४९.९२ किलोवाटयुक्त एट्टो ३ लाई एड्भान्स्ड र ६०.४८ किलोवाटयुक्त एट्टो ३ लाई सुपेरियर भनेर राखिएको छ । मूल्य वाहेक यी दुई गाडीको फिचरमा धेरै फरक छैन । यसमा भएको ब्याट्रीले सिंगल चार्जमा ३५० किलोमिटरको रेन्ज दिनेछ ।

हाल यो गाडी अवलोकन र टेस्ट ड्राइभ गर्न सकिने भएको छ । केही दिनमै यो गाडीको डेलिभरी समेत प्रारम्भ गरिने साइमेक्स इंकले जनाएको छ ।

पछिल्लो समयमा नेपाली बजारमा विभिन्न ब्रान्डका इलेक्ट्रिक कारहरु भित्रिरहेका छन् र प्रतिस्पर्धा बढिरहेको छ । यो अवस्थामा प्रतिस्पर्धामा सामेल हुनका लागि विभिन्न फिचरहरुमा परिमार्जन गर्ने लहर बढ्दो छ । यो अवस्थामा बीवाईडी पनि सामेल भएको हो ।