एलएफपी ब्लेड ब्याट्री उत्पादनका लागि बीवाईडीले दियो जीएम र फोर्डको सप्लायरलाई सहमति

कमर्सियल सवारी साधनका लागि आवश्यक लिथियम आइरन फस्फेट (एलएफपी) ब्लेड ब्याट्री प्याक उत्पादन गर्नका लागि बोर्गवार्नर इंकले बीवाईडीको सहायक कम्पनी फिनड्रिम्ससँग रणनीतिक सहकार्यको घोषणा गरेको छ ।

सहमति अनुसार बीवाईडीले बार्गवार्नरलाई ब्लेड सेल उपलब्ध गराउने छ, जसलाई युरोप र अमेरिकामा ब्याट्री उत्पादन गर्नका लागि प्रयोग गरिने छ । सो सहमतिको अवधि ८ वर्षको हुनेछ । यस अनुसार बोर्गवार्नरले फिनड्रिम्सको ब्याट्री प्याक डिजाइन र म्यानुफ्याक्चरिङ प्रोसेसको प्रोपर्टी राइट समेत पाएको छ ।

बोर्गवार्नर न्युयोर्क स्टक एक्सचेन्जमा सूचीकृत भएको अमेरिकी अटोमोटिभ सप्लायर हो । यसले जीएम, फोर्ड र स्टेलान्टिस लगायतका सवारी निर्माता कम्पनीलाई विभिन्न पार्ट्स उपलब्ध गराउँछ ।

बीवाईडीका इलेक्ट्रिक कारका साथै ब्याट्री प्रविधिमा पनि विश्वमै लोकप्रिय छ । बीवाईडीको ब्लेड ब्याट्रीले पछिल्लो समयमा निकै नै चर्चा पाइरहेको छ ।

ब्लेड ब्याट्री हाल बजारमा आएको नयाँ प्रविधिको ब्याट्री हो, जसलाई इलेक्ट्रिक गाडीमा प्रयोग गर्न सकिन्छ । यसलाई ब्याट्री प्याकमा ब्लेड जसरी मिलाएर राख्न सकिन्छ । परम्परागत लिथियम ब्याट्री र लिथियम आइरन फस्फेट ब्याट्री भन्दा यो बढी सुरक्षित हुनुका साथै लामो रेन्ज दिने र टिकाउ समेत हुन्छ ।