एनईभी उत्पादनमा बीवाईडीको नयाँ किर्तिमान, सिल ०८ बन्यो एक करोड ७० लाखौं कार

काठमाडौं–विश्वप्रसिद्ध अटोमोबाइल कम्पनी बीवाईडीले न्यु इनर्जी भेहिकल (एनईभी) उत्पादनमा नयाँ कीर्तिमान कायम गरेको छ । गत जुलाई ८ मा कम्पनीले आफ्नो उत्पादन लाइनबाट १ करोड ७० लाखौं गाडी सफलतापूर्वक बाहिर ल्याएर यो ऐतिहासिक माइलस्टोन पार गरेको हो ।

कम्पनीको यो ऐतिहासिक उपलब्धिलाई प्रतिनिधित्व गर्ने गाडी हालै सार्वजनिक गरिएको नयाँ फ्ल्यागसिप सेडान सिल ०८ बनेको छ । उक्त गाडी गत जुलाई २ मा मात्रै औपचारिक रूपमा बजारमा ल्याइएको थियो ।

यो कीर्तिमानले बीवाईडीको उत्पादन क्षमतामा आएको अभूतपूर्व वृद्धिलाई प्रस्ट्याउँछ । यसअघि १८ नोभेम्बर २०२४ मा १ करोड एनईभी उत्पादन गर्ने विश्वकै पहिलो अटोमेकर बनेको बीवाईडीले १८ डिसेम्बर २०२५ मा १ करोड ५० लाख गाडी उत्पादन गरेको थियो ।

कम्पनीले १ करोड ५० लाखको आँकडा पार गरेको ६ महिनाभन्दा केही बढी समयमै तथा १ करोड ६० लाख युनिट पुगेको ३ महिनाभन्दा कम अवधिमै १ करोड ७० लाखको नयाँ उचाइ छोएको हो ।

नयाँ सिल ०८ लाई कम्पनीले आफ्नो अत्याधुनिक ‘ओसियन एस्थेटिक २.०’ डिजाइन शैलीमा तयार पारेको छ । सुरक्षा र इन्टेलिजेन्ट ड्राइभिङका लागि यसको छतमा लिडार सेन्सर र ‘गड्स आई बी’ ड्राइभिङ असिस्टेन्स सिस्टम’ जडान गरिएको छ । गाडीको भित्री क्याबिनलाई ’मिनिमलिस्टिक’ र प्रविधियुक्त बनाइएको छ । यसमा ठूलो फ्लोटिङ स्क्रिन र डिजिटल इन्स्ट्रयुमेन्ट क्लस्टर उपलब्ध छ ।

यो कार पूर्ण विद्युतीय र प्लग–इन हाइब्रिड दुवै विकल्पमा उपलब्ध छ र दुवैमा फ्ल्यास चार्जिङ प्रविधि प्रयोग गरिएको छ । जसमा, पूर्ण विद्युतीय मोडल ८००–भोल्टको हाई–भोल्टेज प्लेटफर्ममा आधारित छ । यो संस्करण दोस्रो पुस्ताको ब्लेड ब्याट्रीद्वारा सञ्चालित छ । यसले एक पटकको फुल चार्जमा ९०५ किलोमिटरको सीएलटीसी रेन्ज दिने दाबी गरिएको छ । साथै, फ्ल्याश–चार्ज प्रविधिमार्फत मात्र ५ मिनेट चार्ज गर्दा यसले ४०० किलोमिटरसम्मको रेन्ज प्राप्त गर्न सक्छ ।