बाउन्स इन्फिनिटी ई१ इलेक्ट्रिक स्कुटरको परीक्षण चल्दै, छिट्टै नेपाली बजारमा उपलब्ध हुने

मोडर्न टचका साथ रेट्रो लुकमा उपलब्ध बाउन्स इन्फिनिटीको इलेक्ट्रिक स्कुटर ई१ नेपाल आउने भएको छ । नेपालका लागि आधिकारिक वितरकको रुपमा न्यु इनर्जी मोटर्सले सो स्कुटर नेपाल भित्र्याउने भएको हो । हाल यसको परीक्षण चलिरहेको र नेपाली सडक अनुसार यसमा केही परिमार्जन समेत गरिने कम्पनीको भनाइ छ ।

स्मार्ट इलेक्ट्रिक स्कुटरको रुपमा परिचित यो स्कुटरको लुक फरक हुनुका साथै यसमा स्वापेबल र पोर्टेबल ब्याट्री सिस्टम समेत रहेको छ । नेपालमा आवश्यकता अनुसार यसको समेत अप्सन उपलब्ध हुन सक्ने छ ।

बाउन्स इन्फिनिटी ई१ मा अल एलईडी लाइट उपलब्ध छ । यसमा भएको ह्यान्डल माउन्टेड एलईडी हेडल्याम्प स्टाइलिस र पावरफुल छ । यसको इन्डिकेटर पनि एलईडीयुक्त छ । यसले गर्दा स्कुटर स्पोर्टी देखिएको छ ।

यसमा सीबीएसका साथै ईबीएस समेत उपलब्ध छ । दुवै पांग्रामा डिस्क ब्रेक रहेको यो स्कुटरमा कम्बो ब्रेकिङ सिस्टमका साथै रिजेनेरेटिभ ब्रेकिङ सिस्टम उपलब्ध छ ।

बाउन्स इन्फिनिटी ई१ इलेक्ट्रिक स्कुटरमा सिक्स–एक्सिस एक्सेलेरोमिटर, ओभरभोल्टेज तथा अन्डरभोल्टेज प्रोटेक्सन, डिजिटल स्पिडोमिटर, साइड स्ट्यान्ड सेन्सर, एन्टी थेफ्ट अलार्म, जियो–फेन्सिङ र विभिन्न गतिविधि जानकारीका लागि अलर्ट सिस्टम पनि उपलब्ध छ । स्मार्टफोनमा उपलब्ध हुने स्कुटरको एपमार्फत सो जानकारी लिन सकिन्छ ।

सो इलेक्ट्रिक स्कुटरमा आईपी६७ रेटिङयुक्त बीएलडीसी हब मोटर छ । यसको पावर १.५ देखि २.२ किलोवाट सम्म छ । यसले १ हजार ५ सय वाटको पावर जेनेरेट गर्छ ।

यसमा २ किलोवाट आवर क्षमताको लिथियम आयोन ब्याट्री छ, जसले सिंगल चार्जमा ८५ किलोमिटर सम्मको रेन्ज दिन्छ । ब्याट्रीलाई सामान्यतः साढे २ घण्टामै फुल चार्ज गर्न सकिने कम्पनीको भनाइ छ ।

६५ किलोमिटर प्रतिघण्टा टप स्पिड रहेको सो इलेक्ट्रिक स्कुटरमा इको र स्पोर्ट्सका साथै रिभर्स मोड समेत रहेको छ । यसको मूल्य ३ लाख २५ हजार रुपैयाँ हुने कम्पनीको भनाइ छ ।

बाउन्स इन्फिनिटी प्रसिद्ध ताइवानी कम्पनी हो । हाल यसको सम्पूर्ण सेयर भारतीयहरुले लिएका छन् ।

परीक्षण पश्चात छिट्टै नै यो स्कुटर नेपाली बजारमा बिक्रीका लागि उपलब्ध हुने बताइएको छ ।