अर्को नयाँ इलेक्ट्रिक मोटरसाइकल भित्रिदै, खुल्यो बुकिङ

काठमाडौं – काठमाडौंमा प्रारम्भ भएको हिमालयन हाइड्रो एक्सपोमा भारतीय इलेक्ट्रिक ब्रान्ड प्योर ईभीको इलेक्ट्रिक मोटरसाइकल ईट्रिस्ट ३५० को बुकिङ खुलेको छ । नेपालका लागि प्योर ईभीको आधिकारिक वितरक ह्वाइट लोटस मोटर्स प्रालिले आफ्नो स्टलमार्फत बुकिङ खुलाएको हो ।

३.५ किलोवाट आवरको लिथियम आयोन ब्याट्री भएको सो मोटरसाइकलले सिंगल चार्जमा १४० किलोमिटर सम्मको रेन्ज दिने बताइएको छ । यसको टप स्पिड ८५ किलोमिटर प्रतिघण्टा छ । ब्याट्रीलाई फुल चार्ज हुन ६ घण्टा लाग्छ । यसमा ८४ भोल्ट ८ एम्पियरको चार्जर प्रयोग गर्न सकिन्छ ।

ड्राइभ, क्रसओभर र थ्रिल गरी तीन ड्राइभिङ मोड रहेको प्योर ईभी ईट्रिस्ट ३५० मा २.५ किलोवाटको नोमिनल र ४ किलोवाटको पिक बीएलडीसी हब मोटर छ ।

यो मोटरसाइकलमा डिजिटल स्पिडोमिटर र ओडोमिटर, सेन्ट्रल लकिङ तथा एलईडी हेडलाइट, टेललाइट, टर्न सिग्नल ल्याम्प र डीआरएल रहेको छ । यसको ग्राउन्ड क्लियरेन्स १९८ एमएम छ ।

ह्वाइट लोटर्स मोटर्स स्रोतका अनुसार यो मोटरसाइकल करिव एक महिना भित्र नेपाली बजारमा उपलब्ध हुनेछ । यसको मूल्य अहिले नै निश्चित नगरिए पनि करिव ४ लाख २० हजार रुपैयाँको हाराहारी पर्ने अनुमान गरिएको छ । हाल बुकिङ गर्ने ग्राहकलाई केही रकम छुट समेत उपलब्ध हुने बताइएको छ ।