रेनो डस्टर बीएस६ को खुल्यो बुकिङ, उही मूल्यमा उपलब्ध हुने

काठमाडौं – नेपाली ग्राहकले पनि अब बीएस६ इन्जिनयुक्त रेनो डस्टर चढ्न पाउने भएका छन् । नेपालका लागि रेनोको आधिकारिक वितरक एड्भान्स्ड अटोमोबाइल्सले रेनो डस्टर बीएस६ को बुकिङ खुला गरेको छ ।

कम्पनीले पहिले देखि नै नेपाली बजारमा रेनो डस्टर बिक्री गरिरहेको भए पनि अब बीएस६ इन्जिनमा ल्याउन लागेको हो । यसको मूल्य पनि बढाइएको छैन । करिव एक महिना भित्रै यो गाडी नेपाली बजारमा उपलब्ध भइसक्ने बताइएको छ ।

नयाँ बीएस६ मापदण्डयुक्त रेनो डस्टरमा १.५ लिटर पेट्रोल इन्जिन रहेको छ, जसले १०६ एचपी पावर र १४२ एनएम टर्क जेनेरेट गर्छ । यसमा ५ स्पिड म्यानुअल गियरबक्स रहेको छ ।

त्यसैगरी यसमा ड्राइभर तथा फ्रन्ट प्यासेन्जर एयरब्याग, सिट बेल्ट रिमाइन्डर, रिभर्स पार्किङ सेन्सर आदि विशेषता छन् । यसको वाहिरी र भित्री बनावटमा भने खासै परिवर्तन गरिएको छैन ।

ड्युअल एयरब्याग, स्मार्ट ड्यासबोर्ड, अलोय ह्विल, हिल असिस्ट, इलेक्ट्रोनिक स्टेबिलिटी प्रोग्राम लगायतका विभिन्न विशेषता भएको नयाँ रेनो डस्टर आरएक्सएसको मूल्य ४६ लाख ९९ हजार रुपैयाँ तोकिएको छ । त्यसैगरी आरएक्सजेडको मूल्य ५० लाख ९९ हजार रुपैयाँ तोकिएको छ । यी दुवै गाडी म्यानुअल ट्रान्समिसनमा उपलब्ध हुने छन् ।