नागरिक एपबाट यसरी गरौं ब्लुबुक नवीकरण (प्रक्रियाको जानकारी)

काठमाडौं – यही फागुन १ देखि ब्लुबुक नवीकरण नागरिक एपबाटै गर्न सकिने सुविधा प्रारम्भ भएको छ । हाल ई–सेवा र खल्ती डिजिटल एपबाट यो सुविधाका लागि रकम भुक्तानी गर्न सकिने सुविधा उपलब्ध छ ।

हाल बागमती प्रदेशमा मात्र उपलब्ध भएको यो सुविधा भविष्यमा अन्य प्रदेशमा समेत प्रारम्भ हुने आशा गर्न सकिन्छ । यसका लागि निम्न प्रक्रिया अपनाउन सकिन्छ :

– सबैभन्दा पहिले बागमती प्रदेशको यातायात व्यवस्थापन सूचना प्रणालीमा आफ्नो सवारी साधनको सबै विवरण भरेको हुनुपर्छ । यदि यो विवरण भरेको छैन भने यसका लागि नागरिक एप वा बागमती प्रदेशको पोर्टलबाट सहज तरिकाले भर्न सकिन्छ ।

– आफ्नो स्मार्टफोनमा नागरिक एप छैन भने नागरिक एप डाउनलोड गर्ने । छ भने ठीक छ । नागरिक एप लगइन गरीसके पछि त्यहाँ भएको भेइकल ट्याक्स अर्थात सवारी कर लेखिएको विकल्पमा गएर आफ्नो सवारी साधनको विवरण भर्ने ।

– सवारी साधनको विवरण भर्दै गए पछि बागमती प्रदेश छनोट गरेर आफ्नो सवारी साधन दर्ता रहेको कार्यालय छनोट गर्ने ।

– सवारी साधनको किसिम छानी नम्बर र अन्य विवरण उल्लेख गर्ने । अनि अन्तिममा रहेको सर्च बटन थिच्ने ।

– पहिले नै यातायात व्यवस्थापन सूचना प्रणालीको सर्भरमा भएको विवरण अनुसारको सवारी साधनको विवरण यसमा देखिन्छ । त्यसपछि दायाँबाट बायाँतर्फ स्वाइप गर्दा आफ्नो सवारी साधनको तिर्नुपर्ने सम्पूर्ण विवरण देखिन्छ । त्यसको अन्तिममा रहेको ‘पे नाउ’ लेखिएको बटन थिच्ने । त्यसपछि सम्पूर्ण रकम सहितको विवरण देखिए पछि आफूलाई पायक पर्ने कार्यालय छनोट गर्ने ।

– अब कुनबाट भुक्तानी गर्ने भन्न विकल्प रोज्न सकिन्छ । ती मध्ये एउटा विकल्प छनोट गरी नवीकरण दस्तुर बुझाउने ।

– अब नागरिक एपमा पहिले सवारी विवरण देखिएको स्थानमा बायाँतर्फ आफूले भुक्तानी गरेको सवारी करको विवरण हेर्न सकिन्छ । यहीबाट हालै आफूले भुक्तानी गरेको पछिल्लो रकमको बिल डाउनलोड गर्ने ।

– अब कुनै इन्स्योरेन्स कम्पनीबाट तेस्रो पक्ष बिमा गर्न सकिन्छ । ई–सेवा र अन्य विभिन्न वालेटबाट पनि यस्तो इन्स्योरेन्स खरिद गर्न सकिन्छ ।

– अब यो तेस्रो पक्ष बिमा गरिएको कागजात र हालै डाउनलोड गरेको बिलबिजक प्रिन्ट गर्ने र नजिकको यातायात कार्यालय जाने । मोबाइलबाट यो सबै कार्य गरेको एक महिना भित्र यो कार्य गर्न सकिन्छ । त्यसपछि ब्लुबुक नवीकरण हुन्छ ।