गाडीको कालो सिसा र स्टिकर हटाउने सरकारको निर्णय, सुरक्षा कि सास्ती ?

काठमाडौं–नेपाल सरकार र ट्राफिक प्रहरीले सडक सुरक्षा तथा आपराधिक गतिविधि नियन्त्रणका लागि सवारी साधनमा गैरकानुनी रूपमा राखिएका कालो सिसा (टिनटेड ग्लास) र अनधिकृत स्टिकरहरू हटाउने अभियानलाई तीव्र बनाएको छ । सरकारको यस कदमले एकातिर सुरक्षा व्यवस्था चुस्त बनाउने अपेक्षा गरिएको छ भने अर्कोतिर सवारी धनीहरूमाझ यसका फाइदा र आवश्यकतालाई लिएर बहस सुरु भएको छ ।

सवारी धनी तथा विज्ञहरूका अनुसार गाडीमा कालो सिसा र स्टिकर प्रयोग गर्नुका केही व्यावहारिक फाइदाहरू पनि छन् । कालो सिसाले सूर्यको हानिकारक पराबैजनी (यूभी किरण र अत्यधिक तापलाई गाडीभित्र छिर्न दिँदैन, जसले गर्दा भित्री भाग (इन्टेरियर) सुरक्षित रहन्छ ।

गाडीभित्र तापक्रम कम हुँदा एयर कन्डिसनर (एसी) को प्रयोग घट्छ, जसले गर्दा इन्धनको बचत हुन्छ । त्यसैगरी, यसले चालक र यात्रीलाई व्यक्तिगत गोपनीयता प्रदान गर्नुका साथै गाडीभित्र राखिएका बहुमूल्य सामानहरू बाहिरबाट देखिनबाट समेत जोगाउँछ ।

गाडीको सिसा वा बडीमा टाँसिने विशेष स्टिकरले कतिपय अवस्थामा स्क्र्याच पर्नबाट जोगाउने र गाडीलाई आकर्षक देखाउने काम गर्छ ।

सरकारले किन चाल्यो हटाउने कदम ?
फाइदाहरू हुँदाहुँदै पनि सुरक्षा संवेदनशीलताका कारण सरकारले यसमा कडाइ गरेको हो । गृह मन्त्रालय र ट्राफिक प्रहरीका अनुसार कालो सिसाको आडमा सवारी साधनभित्र अवैध हतियार, लागूऔषध ओसारपसार, वा अपहरण जस्ता आपराधिक क्रियाकलाप लुकाउन सजिलो हुने गरेको पाइएको छ ।

त्यसैगरी, रात्रिकालीन समयमा वा खराब मौसममा कालो सिसाका कारण चालकको ’भिजिबिलिटी’ कमजोर भई सडक दुर्घटनाको जोखिम बढ्नो गृह प्रशासनको ठहर छ । जथाभाभी टाँसिने ठूला र अनधिकृत स्टिकरहरूले अन्य चालकहरूको ध्यान भङ्ग गराउने र ट्राफिक नियमनमा बाधा पु-याउने प्रहरीको निष्कर्ष छ ।

के छ सजायको व्यवस्था?
काठमाडौँ उपत्यका लगायत देशैभरि थालिएको विशेष चेकिङका क्रममा अनुमति विना कालो सिसा वा स्टिकर राखेको पाइएमा स्थलगत रूपमै त्यसलाई निकाल्न लगाइने र सवारी धनीलाई आर्थिक जरिबाना समेत गरिने ट्राफिक प्रहरीले जनाएको छ । विशेष सुरक्षा थ्रेट भएका विशिष्ट व्यक्ति (भीआईपी) र कूटनीतिक नियोगका सवारी साधनले भने गृह मन्त्रालयको पूर्व स्वीकृति लिएर मात्र यस्तो सिसा प्रयोग गर्न पाउनेछन् ।