भरतपुरको सार्वजनिक यातायात सुधारका लागि वागमती अटोमोबाइल्स एसोसिएसनले विभिन्न कार्य गर्ने

चितवन – भरतपुर महानगरपालिका भित्रका सार्वजनिक यातायात सुधारका लागि भरतपुर महानगरपालिका र वागमती अटोमोबाइल्स एसोसिएसन बिचमा एक समझदारी सम्पन्न भएको छ । उक्त समझदारी पत्रमा भरतपुर महानगरपालिकाको तर्फबाट निमित्त प्रमुख प्रशासकीय अधिकृत उपेन्द्रराज पौडेल र एसोसिएसनका अध्यक्ष राजन पियाले हस्ताक्षर गरेका छन् ।

महानगरपालिकाकी मेयर रेणु दाहाल र एसोसिएसनका अध्यक्ष राजन पियाले सो सम्बन्धी समझदारी पत्र आदानप्रदान गरे ।

समझदारी अनुसार भरतपुर महानगरपालिका भित्रका सार्वजनिक यातायात सुधारका लागि सार्वजनिक यातायातको अध्ययन गरी सुझाव प्रतिवेदन सहितको प्रारम्भिक डाटावेस एसोसिएसनले तयार गर्ने र यस प्रयोजनको सहजीकरणका लागि महानगरपालिकाले महानगरको यातायात शाखा हेर्ने एक जना अधिकृतस्तरको कर्मचारीलाई सम्पर्क व्यक्ति तोक्ने र दोश्रो पक्षले महानगरसित सोही व्यक्तिमार्फत समन्वय गर्नेछ ।

महानगरपालिका भित्रका यातायत क्षेत्रसँग सम्बन्धित सरकारी तथा गैरसरकारी संस्थाहरू, सवारी चालक, सहचालक, यातायात व्यवसायी, उपभोक्ता तथा सम्बन्धित सरोकारावालाहरूलाई दिगो सार्वजनिक यातायात सम्बन्धी अभिमुखिकरण तथा तालिम प्रदान गरिने छ ।

महानगरपालिकाले तोकेको कुनै वसविसौनी वरपर एसोसिएसनले सडक सुरक्षाका चिन्हहरू (जेब्रा क्रसिङ्ग, ट्राफिक चिन्ह जडान आदि) व्यवस्थापन गर्ने र यस कार्यका लागि नेपाल अटोमोबाइल्स एसोसिएसन, अन्तर्राष्ट्रिय अटोमोबाइल फेडेरेसन आदि राष्ट्रिय अन्तर्राष्ट्रिय संघसंस्थाहरूसँग सहकार्य गर्न सकिने छ भने व्यवस्थापनमा नासा फाउण्डेसनसँग सहकार्य गरिने छ ।

महानगरभित्र भित्र कार्यरत ट्राफिक प्रहरीहरूलाई ट्राफिक ज्याकेट र स्पिड गन आदि उपलब्ध गराउनुका साथै अन्य कार्य समेत गरिने छ ।