नेपाली बजारमा यसअघि नै उपलब्ध बेनेली टिआरके २५१ आज भारतमा लन्च

बेनेलीले आज भारतीय बजारमा नयाँ बाइक टिआरके २५१ लन्च गरेको छ । नेपाली बजारमा भने यो बाइक बिगत ३ बर्षदेखिनै उपलब्ध रहँदै आएको छ । २४९ सिसी क्षमताको एड्भेन्चर टुरर यो बाइकको मूल्य भारतमा २ लाख ५१ हजार भारु कायम गरिएको छ । नेपालमा भने यसलाई ८ लाख २५ हजार रुपैयाँमा बिक्री गरिँदै आएको छ । २०२२ मोडलको यो बाइकले केटिएम २५० एड्भेन्चरसंग सिधा प्रतिस्पर्धा गर्ने देखिएको छ ।

यो नयाँ बाइकको अधिकतम पावर २५.८ एचपी र टर्क २१.१ एनएम रहेको छ । ६ स्पिड ट्रन्समिसन दिइएको यो बाइकमा वेट मल्टि–प्लेट क्लच उपलब्ध गराइएको छ । यसको लुक्स तथा डिजाइन टिआरके ५०२ बाट प्रेरित भएको देख्न सकिन्छ । जहाँ डुअल एलइडी हेडलाइट, युनिक एलइडी डे टाइम रनिङ लाइट, अग्लो वाइन्ड स्क्रिन, स्लिक लुक फ्रन्ट बिक, पूर्णत डिजिटल इन्स्ट्रमेन्ट क्लस्टर, साइड माउन्टेड एक्जस्ट सिस्टम, सार्प वडिवर्क। अपराइड ह्यान्डल बार लगायत अन्य थुप्रै प्रकारका फिचर्स दिइएको छ ।

१६४ किलो वजन भएको यो बाइकमा १८ लिटर क्षमताको फ्युल ट्यांक र १७० एमएम ग्राउन्ड क्लिरियन्स रहेको छ । एड्भेन्चर टुरका लागि उपयोगी र आरामपन महशुस हुने बिशेष प्रकारको सस्पेन्सन जडान गरिएको छ । राइडरले आफू अनुकुल तलमाथी गर्न मिल्ने फ्रन्ट फर्क सस्पेन्सन जडान गरिएको यसमा पछाडी भने मोनोसक सस्पेन्सन दिइएको छ ।

३ भिन्न कलर अप्सनमा उपलब्ध यो बाइकमा कम्पनीले ३ बर्षको असिमित किलोमिटर वारेन्टि उपलब्ध गराउने जनाएको छ ।