यस्तो छ नेपाली बजारमा भित्रिएको बेनेली टीआरके २५१ एड्भेन्चर बाइक

बेनेली मोटरसाइकलको नेपालका लागि आधिकारिक बितरक केटिएम इन्टरनेसनल ट्रेडिङ प्रालिले हालै भित्र्याएको टीआरके मोटरसाइकल अहिले एड्भेन्चर बाइक प्रेमीमाझ लोकप्रिय बनिरहेको छ । चीनबाट आयात गरी ल्याइएको यो मोटरसाइकल यूरो ६ मापदण्डको हो । जसको मूल्य ८ लाख २५ हजार रुपैयाँ निर्धारण गरिएको छ ।

यो बाइकमा २४९ सीसीको सिंगल सिलिन्डर, ४ स्ट्रोक ४ भल्वयुक्त नयाँ जेनेरेसनको ईएफआई इन्जिन जडान गरिएको छ । जसको अधिकतम पावर २५.५ एचपी र टर्क २१.१ एनएम रहेको छ ।

६ स्पिड गियरबक्स दिइएको यो बाइकको ग्राउन्ड क्लियरेन्स १७० एमएम रहेको छ । साथै वेट मल्टिप्लेट क्लच जडान गरिएको यो बाइकमा स्टिल ट्युव ट्रेलिस च्यासिस दिइएको छ ।

डुअल एबीएस सहितको फोर क्लिपर डिस्क ब्रेक जडान गरिएको टीआरके २५१ मा राइडरले आफू अनुकूल तलमाथि गर्न मिल्ने इन्भर्टेड फ्रन्ट फोर्क्स सस्पेन्सन दिइएको छ । पछाडि सेन्ट्रल सक एब्जर्बर सहितको स्विंगआर्म सस्पेन्सन जडान गरिएको छ ।

यो नयाँ बाइकमा पूर्णत डिजिटल डिस्प्ले र ट्विन प्रोजेक्टर एलईडी हेडलाइट उपलब्ध गराइएको छ । सेतो, कालो र रातो कलरमा उपलब्ध यो बाइकमा लामो यात्रा गर्न सहज हुने गरी १८ लिटर क्षमताको फ्युल ट्यांक जडान गरिएको छ । बाइकको कुल तौल १६४ किलोग्राम रहेको छ ।