चर्चामा बतास समूह : अटोमोबाइल व्यवसायमा मानिन्छ प्रतिष्ठित

पछिल्लो केही दिन यता सञ्चार माध्यममा सबैभन्दा बढी चर्चा गरिएको विषय हो बतास समूह । नारायणहिटी दरबार संग्रहालयमा रेस्टुरेन्ट निर्माण थालेँंगै चर्चामा आएको यो समूहका बारेमा अहिले विभिन्न बहसहरु भैरहेका छन् ।

पोखरामा व्यवसाय थालेर राष्ट्रिय स्तरमा उदाएको यो समूहलाई नेपालको अटोमोबाइल व्यवसायमा समेत प्रतिष्ठित घरानाका रुपमा लिने गरिन्छ ।

नेपालमा आइसर गाडीको आयात गरी कारोबार गर्दै आइरहेको बतासले हाल पोखरामा मारुती सुजुकी, महिन्द्रा प्यासेन्जर कार र टीभीएस मोटरसाइकल तथा स्कुटरको आधिकारिक डिलरका रुपमा कार्य गर्दै आइरहेको छ । यी तीनवटै ब्रान्डका सवारीसाधनको बिक्रीमा यो समूह नेपालकै अग्रणी डिलर समेत मानिन्छ ।

बतास संलग्न अर्को कम्पनी अटो वेज प्रालिले पोखरा, बुटवल र चितवनमा टोयोटा गाडीको बिक्री बितरण गरिरहेको छ भने नेपालमा अमेरिकन ब्रान्ड जिपको कारोबारमा समेत यो समूह संलग्न रहेको छ ।

त्यसैगरी सोही समूह अन्तर्गतको त्रिथुंगा ट्रेडिङ कन्सर्नले पेट्रोनास लुब्रिकेन्ट्स, ग्लोब्याट र डेल्टा ब्याट्री सहित इन्भर्टर र अनलाइन युपिएस समेत आयात गरी कारोबार गरिरहेको छ ।

यो समूहले करोबार गर्ने यी सबै ब्रान्ड आ–आफ्नो क्षेत्रमा प्रख्यात मानिन्छन् । यो समूहले केही वर्षदेखि स्वदेशमै लुब्रिकेन्ट्स समेत उत्पादन गरी बिक्री बितरण गरिरहेको छ । उसले मोटोरोल ब्रान्डमा लुब्रिकेन्ट्स उत्पादन गरी कारोबार गर्दै आएको हो ।

बतास समूहमा आनन्दराज बतास अध्यक्षको रुपमा कार्यरत छन् । यो समूहमा अन्य दुई दाजुभाई विपिनराज बतास र शान्तराज बतास समेत संलग्न छन् ।