बास मोडलले ल्यायो विद्युतीय सवारीमा क्रान्ति, ब्याट्री भाडामा लिन पाउने सुविधा

भारतको विद्युतीय सवारी साधन बजारमा बास अर्थात् ब्याट्री एज-ए-सर्भिस मोडल तीव्र रूपमा लोकप्रिय हुँदै गएको छ। यस योजनाअन्तर्गत ग्राहकले गाडी सस्तो मूल्यमा किन्न सक्ने र दैनिक सञ्चालनमा पनि उल्लेखनीय खर्च कटौती हुने देखिएको छ। बजारमा यसको माग तीव्र रूपमा बढिरहेको छ ।

एमजी मोटरले बास मोडलमा आधारित विन्डसर ईभी लन्च गरेको थियो भने हालै हिरो मोटोकर्पले पनि बास मोडलमार्फत भिडा भीएक्स२ इलेक्ट्रिक स्कुटर बजारमा ल्याएको छ । यस्तो सस्तो मूल्यमा उपलब्ध हुनुको कारण स्कुटरसँग ब्याट्री नदिइ बास मोडलमार्फत छुट्टै भाडामा उपलब्ध गराउनु हो।

सामान्य रूपमा, विद्युतीय सवारीमा सबैभन्दा महँगो भाग भनेकै ब्याट्री हो। सो सवारीको कुल मूल्यको ४० देखि ५० प्रतिशतसम्म हिस्सा ओगट्न सक्छ। यस्तोमा, कम्पनीले बास मोडलमार्फत ग्राहकलाई ब्याट्रीको मूल्य तिर्ने झन्झटबाट छुटकारा दिँदै, सस्तो मूल्यमा गाडी उपलब्ध गराइरहेका छन्। यो मोडल एक प्रकारको सदस्यता प्रणाली हो, जसमा ग्राहकले गाडी भने किन्छन् तर ब्याट्री भाडामा लिन्छन्। प्रयोगको आधारमा, मासिक शुल्क तिरेर ब्याट्रीको सेवा लिइन्छ।

कम्पनीका अनुसार बास अन्तर्गत यसको सञ्चालन लागत प्रति किलोमिटर ०.९६ पैसा मात्र पर्छ। त्यस्तै एमजी विन्डसर ईभीको सन्दर्भमा यसको सञ्चालन खर्च प्रति किलोमिटर ३.५० भारु मात्र छ, जुन पेट्रोल कारको ६ देखि १० रुपैयाँ खर्चभन्दा धेरै सस्तो हो ।

बास योजनाले ब्याट्रीमा समस्या आएमा निःशुल्क मर्मत तथा प्रतिस्थापनजस्ता सेवा पनि प्रदान गर्छ। तर यस्तो योजनामा सहभागी हुनुअघि ग्राहकले नियम, सर्त र लुकेका शुल्कहरूको बारेमा डिलरबाट विस्तृत जानकारी लिनु आवश्यक हुन्छ।

भारतजस्तो मूल्य-संवेदनशील बजारमा बास मोडलले विद्युतीय सवारीलाई अझ सुलभ र किफायती बनाइरहेको छ। यस योजनाको लोकप्रियता भविष्यमा अझ बढ्ने अनुमान गरिएको छ।