डिजिटल फिचर्स र नयाँ चेसिससहित आउँदै नयाँ पुस्ताको पल्सर

काठमाडौँ–बजाजले आफ्नो चर्चित मोडल पल्सरको नयाँ पुस्ता आगामी अगस्ट १२ मा सार्वजनिक गर्ने भएको छ । कम्पनीले आधिकारिक नाम सार्वजनिक नगरे पनि यो नयाँ बाइक १२५ सीसी वा परिमार्जित १५० सीसी सेग्मेन्टमध्ये कुनै एक हुने अनुमान गरिएको छ ।

सार्वजनिक गर्नुअघि कम्पनीले एउटा आधिकारिक टिजर तस्बिर पनि बाहिर ल्याएको छ, जसमा नयाँ बाइकलाई पारदर्शी आवरणभित्र देखाइएको छ । पल्सरको परिचित आकर्षक शैलीलाई निरन्तरता दिँदै यसमा अझ मस्कुलर लुक्स, नयाँ सिग्नेचर हेडल्याम्प र इन्जिनको तल्लो भागमा चिन फेयरिङ दिइएको छ । राइडरको सुरक्षालाई ध्यानमा राख्दै अगाडि र पछाडि दुवैतर्फ डिस्क ब्रेकका साथै एलोय ह्विल राखिएको छ ।

नयाँ पल्सर परिमार्जित सस्पेन्सन सेटअप र नयाँ चेसिसमा आधारित हुने भएकाले यसको ह्यान्डलिङ र राइडिङ अनुभव अझ सहज हुने अपेक्षा गरिएको छ । यसका साथै आधुनिक प्रविधिलाई जोड्दै बाइकमा पूर्ण डिजिटल इन्स्ट्रुमेन्ट कन्सोल, ब्लुटुथ कनेक्टिभिटी र टर्न–बाइ–टर्न नेभिगेसन जस्ता नयाँ सुविधाहरू समेत समावेश गरिएका छन् ।

बजाज अटोको यो नयाँ पल्सर उसको व्यापक उत्पादन विस्तार योजनाको एक हिस्सा रहेको बताइएको छ । कम्पनीले आगामी छ हप्ताभित्रै १० वटा नयाँ तथा अपग्रेडेड बाइक बजारमा ल्याउने तयारी गरेको छ ।