बजाज पल्सर एनएस ४०० जेड अब ३५० सीसी इन्जिनमा पनी

बजाज अटोको लोकप्रिय मोटरसाइकल बजाज पल्सर एनएस ४०० जेड अब ३५० सीसी इन्जिन उपलब्ध हुने भएको छ । यसअघि ४०० सीसी सेग्मेन्टमा पर्ने सो बाइकमा उच्च कर लाग्ने गरेको थियो, तर अब ३५० सीसी इन्जिनका कारण ग्राहकले कम मूल्यमा किन्न सक्ने भएका छन्।

नयाँ संस्करणको मूल्य १ लाख ९३ हजार भारु तोकिएको छ। यसमा ३४९.१३ सीसी क्षमताको लिक्विड कुल्ड सिंगल सिलिन्डर इन्जिन जडान गरिएको छ, जसले ४०.६ पीएस पावर र ३३.२ एनएमको टर्क उत्पादन गर्छ।

नयाँ मोडलमा कुनै उल्लेखनीय परिवर्तन गरिएको छैन । अघिल्लो जस्तै पेरिमिटर फ्रेममा आधारित सो  मोटरसाइकलमा अपसाइड डाउन फोर्क सस्पेन्सन र पछाडि मोनोशक सस्पेन्सन दिइएको छ। साथै, फ्रन्टमा ३२० एमएम र पछाडि २३० एमएम डिस्क ब्रेक, ड्युअल च्यानल एबीएस, १७ इन्चका अलोय ह्विल, एलईडी प्रोजेक्टर हेडल्याम्प, डे-टाइम रनिङ लाइट, १२ लिटर फ्युल ट्याङ्क, राइड-बाइ-वायर थ्रोटल, ट्र्याक्सन कन्ट्रोल, विभिन्न राइडिङ मोड, डिजिटल इन्स्ट्रयुमेन्ट क्लस्टर र ब्लुटुथ कनेक्टिभिटी जस्ता फिचर समावेश गरिएको छ । सो मोटरसाइकल कुल ४ रङमा उपलब्ध हुनेछ।

सो बाइकले भारतीय बजारमा रोयल इन्फिल्ड, होन्डा, जावा र येज्दी जस्ता मोटरसाइकलसँग प्रतिस्पर्धा हुने अपेक्षा गरिएको छ।