बजाजले यही महिना नेपालमा लन्च गर्दै पल्सर एन १२५, कति पर्ला मूल्य ?

काठमाडौं – भारतमा केही समय पहिले लन्च भएको बजाजको कम्युटर सेगमेन्टको मोटरसाइकल पल्सर एन १२५ नेपालमा औपचारिक रुपमा लन्च हुने तयारीमा छ । नेपालका लागि बजाजको आधिकारिक वितरक हंसराज हुलासचन्द एन्ड कम्पनीले यही बैशाख महिनामै सो मोटरसाइकल लन्च गर्ने तयारी भइरहेको बताएको छ ।

बजाज पल्सर एन १२५ नयाँ बाइक हो र यसलाई एन सिरिजका अन्य बाइकहरु जस्तै डिजाइन गरिएको छैन । यस बाइकको स्टाइल र लुक पल्सर एन सिरिजका अन्य बाइकभन्दा बिल्कुलै फरक र नयाँ छ । बाइकको डिजाइन निकै शार्प र ठुलो बनाइएको छ, जसका कारण सो बाइक निकै आकर्षक देखिन्छ ।

कम्पनीले बाइकमा एलईडी हेडलाइट, एलईडी टेललाइट र फुल डिजिटल इन्स्ट्रयुमेन्ट क्लस्टर उपलब्ध गराएको छ । बाइकमा शार्प फ्युल ट्याङ्की कभर र रियर एन्ड पनि छ । बाइकको फ्युल ट्याङ्कीको दुबै छेउमा पल्सर ब्याजिङ र पछाडिको छेउमा १२५ सीसीको लोगो रहेको छ ।

बाइक ३ रङमा उपलब्ध छ ।  बाइकमा १२५ सीसी सिंगल सिलिन्डर एयरकुल्ड इन्जिन प्रयोग गरिएको छ, जसले करिब १२ बीएचपी पावर र  ११ एनएम टर्क जेनेरेट गर्छ । यस बाइकको इन्जिन ५ स्पिड गियरबक्ससँग जोडिएको छ ।

बजाज पल्सर एन १२५ मा पूर्ण रूपमा नयाँ डिस्प्ले दिइएको छ । यसको स्क्रिनमा स्पिड र आरपीएमसँगै गियर पोजिसन इन्डिकेटर, फ्युल लेभल, टाइम जस्ता जानकारी उपलब्ध हुनेछ । सो इन्स्ट्रयुमेन्ट क्लस्टर ब्लुटुथ कनेक्टिभिटीसँग सुसज्जित छ।

बाइकको अगाडि कभरसहित टेलिस्कोपिक फोर्क सस्पेन्सन र पछाडि मोनोसक सस्पेन्सन सेटअप छ । बाइकको अगाडि ९० एमएम चौडा र पछाडि ११० एमएम चौडा टायर जडान गरिएको छ । पल्सर एन१२५ को माइलेज लगभग ६० किलोमिटर प्रति लिटर छ।

यो बाइक नेपाल भित्रिए पश्चात टीभीएस रेडर र हिरो एक्सट्रिम १२५आर तथा होन्डा साइन १२५ लगायतका मोटरसाइकल बिच प्रतिस्पर्धा हुने देखिएको छ ।

पल्सर एन १२५ को मूल्य औपचारिक रुपमा कम्पनीले पछि सार्वजनिक गर्ने भए पनि यसको मूल्य ३ लाख रुपैयाँ हाराहारी हुने अनुमान गर्न सकिन्छ ।