दुई दिन भित्र बुकिङ गर्दा ५ लाख ५० हजारमा आउने बजाजको हाई सीसी सिरिज बाइक

काठमाडौं – नेपाली बजारमा बजाज एनएस सिरिजका बाइक पहिले देखि नै उपलब्ध भइरहेकोमा हालै नाडा अटो शो २०२४ मा पहिलो पटक हाई सीसी सिरिजको बजाज एनएस ४०० जेड मोटरसाइकल लन्च भएको छ ।

४० एचपी पावर र ३५ एनएम टर्क भएको बजाज एनएस ४०० जेड निकै नै पहुँचयोग्य मूल्यमा उपलब्ध भएको कम्पनीको दावी छ । ग्रे, ब्ल्याक, ह्वाइट र रेड गरी चार कलर भेरिएन्टमा उपलब्ध यो बाइकको मूल्य ५ लाख ४९ हजार ९ सय रुपैयाँ तोकिएको छ । बजाजको नेपालका लागि आधिकारिक वितरक हंसराज हुलासचन्द एन्ड कम्पनीले धेरै क्षमता र फिचर सहितको यो मोटरसाइकल उपलब्ध गराएको र त्यस अनुसार यो मूल्य निकै नै उपयुक्त भएको दावी गरेको छ ।

बजारमा १५० सीसी हाराहारी बाइकको मूल्य धेरै भएको सन्दर्भमा ४०० सीसीको बाइक यो मूल्यमा उपलब्ध हुनु आफैमा सकारात्मक भएको बताइएको छ । बजाजले हाल नाडा अटो शोको सन्दर्भमा यो मूल्य कायम गरेको र पछि यसको मूल्य बढ्ने समेत बताएको छ ।

राजधानीको भृकुटीमण्डपमा जारी नाडा अटो शो भोलि आइतबार समापन हुँदैछ । यसकारण भोलि सम्म बुकिङ गर्ने ग्राहकले यो मूल्यमा बाइक प्राप्त गर्न सक्ने छन् ।

कम मूल्यमा बढी क्षमताको मोटरसाइकल भएकाले यसको फिचरमा कमी गरिएको अनुमान धेरैले गर्न सक्छन् । तर यो फिचर लोडेड बाइक हो । यसमा फुल्ली एलईडी लाइट, ठूलो एलसीडी डिस्प्ले, ब्लुटुथ कनेक्टिभिटी, युएसबी चार्जिङ पोर्ट, ट्रयाक्सन कन्ट्रोल, ड्युअल च्यानल एबीएस, राइड बाई वायर टेक्नोलोजी, एड्जस्टेबल क्लच एन्ड ब्रेक लिभर, मल्टिपल राइड मोड र एबीएस मोड जस्ता फिचर उपलब्ध भएको यो मोटरसाइकल धेरैले रुचाउने अनुमान गरिएको छ ।

लुक्सका आधारमा यो एनएस २०० भन्दा ठूलो जस्तो देखिन्छ । मस्कुलर र एरोडाइनामिक प्रोफाइलको साथ डिजाइन गरिएको पल्सर एनएस ४०० जेडमा उत्कृष्ट डिजाइनको फ्युल ट्यांक, आरामदायी स्प्लिट सिट र स्टाइलिस १७ इन्च एलोय ह्विल दिइएको छ । १२ लिटर क्षमताको फ्युल ट्यांक र ८०७ एमएम सिटको उचाइ रहेकोले पल्सर एनएस ४०० जेड सिटी राइड र लामो दूरीको यात्रा दुवैका लागि उपयुक्त छ ।