बजाजले ल्यायो विश्वकै पहिलो सीएनजी बाइक, सर्बाधिक माइलेज दिने दावी

बजाजले विश्वकै पहिलो सीएनजी बाइक लन्च गरेको छ । सो बाइकको नाम फ्रिडम १२५ राखिएको छ । यसमा १२५ सीसी इन्जिन छ । यसमा सीएनजीबाट पेट्रोल र पेट्रोलबाट सीएनजीमा सिफ्ट हुनका लागि स्विच दिइएको छ । अब यो भारतकै सबैभन्दा बढी माइलेज दिने बाइक हुने कम्पनीको दावी छ ।

बाइकको डिजाइन साधारण कम्युटर बाइक जस्तै छ । यसमा एलईडी हेडलाइट तथा टर्न इन्डिकेटर दिइएको छ । यसमा लामो सिंगल पिस सिट र यसको तल सीएनजी ट्यांक छ । यसमा १७ इन्चको अलोय ह्विल र ट्युबलेस टायर छ । फ्रन्टमा डिस्क र रियरमा ड्रम ब्रेक छ ।

बजाज सीएनजी १२५ मा पेट्रोल ट्यांकको साथै सीएनजी बाइक पनि दिइएको छ । यसमा मजबुत ट्यांक, राउन्ड हेडलाइट, ह्यान्डलबार, नकल गार्ड आदि छ ।

सो बाइकलाई एड्भेन्चर स्टाइल दिइएको छ । यसमा ठुलो साइड प्यान, स्टाइलिस बेली प्यान, फाइभ स्पोक अलोय ह्विल, पिलियनका लागि मजबुत ग्र्याब रेल, रिब्ड सिट, टेलिस्कोपिक फ्रन्ट फोर्क्स, रियर मोनोशक सेटअप र टायर हगर आदि छ ।

यसमा २ किलोको सीएनजी ट्यांक र २ लिटरको पेट्रोल ट्यांक छ । सो बाइकले ३३० किलोमिटरको रेन्ज दिने कम्पनीको दावी छ । सीएनजी मात्र प्रयोग गर्दा १०२ किलोमिटर प्रतिकेजी र पेट्रोल प्रयोग गर्दा ६५ किलोमिटर प्रतिलिटर माइलेज दिने बजाजको दावी छ ।

बजाज फ्रिडम १२५ बाइक तीन भेरिएन्टमा उपलब्ध हुनेछ । यसको मूल्य क्रमशः ९५ हजार, १ लाख ५ हजार र १ लाख १० हजार भारु तोकिएको छ ।

बजाजको सीएनजी बाइकको नाम के हुने भनेर पहिले विभिन्न चर्चा भएका थिए । अन्य नाम पनि अनुमान गरिएको थियो । तर अब भने यसको नाम फ्रिडम १२५ पक्का भएको छ ।