एउटै इन्जिन भएका दुई फरक बाइक, यस्तो छ बजाज डोमिनार ४०० र पल्सर ४०० मा भिन्नता

बजाजले हालै पल्सर सिरिजमा सबैभन्दा शक्तिशाली मोटरसाइकल एनएस ४०० जेड लन्च गरेको छ । सो नयाँ मोटरसाइकलमा बजाजले डोमिनार ४०० को इन्जिन राखेर ल्याएको हो । एउटै इन्जिन भएका कारण दुबै बाइकको पावर र पर्फमेन्स समान भएपनि लुक्स तथा डिजाइन र फिचरमा भने भिन्नता छ । यसैगरी, मूल्यका हिसावले डोमिनार ४०० पल्सर एनएस ४०० जेड भन्दा ४५ हजार भारु सस्तो छ ।

डोमिनार ४०० नेपाली बजारमा बिक्री हुँदै आएपनि पल्सर एनएस ४०० जेड आउन केही समय लाग्ने आधिकारिक वितरक हंसराज हुलासचन्द एण्ड कम्पनी प्रालिले जनाएको छ । डोमिनारको मूल्य नेपाली बजारमा ६ लाख रुपैयाँ निर्धारण गरिएको छ । उक्त मूल्यलाई आधार मान्दा पल्सर एनएस ४०० जेड ४ लाख ८० हजार हाराहारीमै नेपाल आउने अनुमान गर्न सकिन्छ ।

इन्जिन र पर्फमेन्स
यी दुबै बाइकमा बजाजले ३७३.३ सिसी क्षमताको सिंगल सिलिन्डर, फोर स्ट्रोक, ४–भल्भ, लिक्विड कुल्ड, ट्रिपल स्पार्क, डिओएचसी र एफआई इन्जिन दिएको छ । उक्त इन्जिनले ३९.४२ बिएचपीको अधिकतम पावर र ३५ एनएम टर्क जेनेरेट गर्दछ । डोमानर भन्दा पल्सर एनस १९ किलोग्रम हलुका भएको कारण यसलाई ह्यान्डिल गर्न सहज हुने देखिन्छ भने माइलेज समेत केही बढी हुनेछ । एआरएआइका अनुसार डोमिनार ४०० ले प्रतिलिटर पेट्रोलको खपतमा ३० किलमोमिटर माइलेज दिन्छ ।

डोमिनार ४०० लाई प्रतिघण्टा १५५ किलोमिटरको टप स्पिडमा गुडाउन सकिन्छ भने पल्सर एनएस ४०० जेडको उच्च गती १४४ किलोमिटर प्रतिघण्टा छ । साथै, डोमिनार ४०० को फ्यूल ट्यांक क्षमता १२ लिटर हुँदा पल्सर एनएस ४०० को १३ लिटर छ । ग्राउन्ड क्लिरियन्स भने पल्सर एनएस ४०० को ११ एमएम बढी छ ।

फिचर
दुबै बाइकमा डिजिटल इन्स्ट्रयुमेन्ट कन्सोल दिइएको छ । जसमार्फत पल्सर एनएस ४०० मा कल र एसएमएस अलर्टबारे जानकारी लिन सकिन्छ भने यो सुविधा डोमिनार ४०० मा उपलब्ध छैन । यसैगरी डोमिनार ४०० मा उपलब्ध नभएको मोबाइल एप कनेक्टिभिटी, जिपिएस एबं नेभिगेसन र यूएसवी चार्जिङ पोर्ट लगायत सुविधा पल्सर एनएस ४०० पाउन सकिन्छ । दुबै बाइकमा पूर्णत एलइडी लाइटिङ सिस्टम दिइएको छ । क्लचको कुरा गर्नुपर्दा डोमिनारमा एसिस्ट एण्ड स्लिपर सहितको वेट मल्टिपल पाउन सकिन्छ भने पल्सर एनएस ४०० मा एसिस्ट एण्ड स्लिपर मात्रै दिइएको छ ।

मूल्य र प्रतिस्पर्धा
एउटै इन्जिन भएपनि सेग्मेन्टका हिसावले यी दुई फरक प्रकारका हुन् । बजाजले डोमिनारलाई स्ट्रिट बाइक र पल्सर एनएस ४०० जेडलाई स्पोर्ट बाइक भनेको छ । यी दुई बाइकको मुल्य भारतीय बजारमा क्रमश २ लाख ३१ हजार र १ लाख ८५ हजार भारु निर्धारण गरिएको छ । यी दुई बाइक एकआपसका प्रतिस्पर्धी समेत हुन् । अन्य ब्राण्डमा जाँदा दुबै बाइकले केटिएम ३९० ड्यूक, ट्रायम्फ स्पिड ४०० र हिरो माभ्रिक ४४० लगायतसंग प्रतिस्पर्धा गर्नेछ ।