अब बजाजको पहिलो इलेक्ट्रिक स्कुटर पनि नेपालमा, मूल्य कति ?

काठमाडौं – बजाजको पहिलो इलेक्ट्रिक स्कुटर चेतक ३५०१ नेपालमा औपचारिक रुपमा लन्च भएको छ । नेपालका लागि बजाजको आधिकारिक वितरक हंसराज हुलासचन्द एन्ड कम्पनीले एक औपचारिक कार्यक्रममार्फत सो स्कुटर सार्वजनिक गरेको हो ।

भारत बाहिर पहिलो बजारको रुपमा बजाजले नेपालमा सो स्कुटर लन्च गरेको हो । यसमा ३.५ किलोवाट आवरको ब्याट्री रहेको छ, जसले सिंगल चार्जमा १५३ किलोमिटरको रेन्ज दिन्छ । यसबाट नेपालका सहरी तथा सहरोन्मुख सबै स्थानका लागि यो स्कुटर उपयुक्त हुने कम्पनीको भनाइ छ । त्यसैगरी यसलाई फास्ट चार्जिङ टेक्नोलोजीमार्फत शून्य देखि ८० प्रतिशत सम्म ३ घण्टामै चार्ज गर्न सकिन्छ ।

बजाज चेतक ३५०१ इलेक्ट्रिक स्कुटरमा भएको फुल–मेटल बडी र आईपी ६७ रेटेड वाटर रेजिस्टेन्सका कारण नेपालको विविध मौसमका लागि उपयुक्त छ । यसमा भएको अल–न्यु फ्लोरबोर्ड ब्याट्री डिजाइनका कारण यो सेगमेन्टमै सबैभन्दा ठूलो ३५ लिटरको अन्डर सिट स्टोरेज यसमा रहेको छ । यसका कारण स्पेस र कम्फर्ट दुवै दृष्टिकोणले सहज भएको छ ।

यसमा उपलब्ध हुने विभिन्न टेकप्याकलाई प्रयोग गरेर इन्टेलिजेन्ट फिचर अनलक गर्न सकिन्छ । यसमा इन्टिग्रेटेड नेभिगेसन, म्युजिक कन्ट्रोल, डकुमेन्ट स्टोरेज र कल ह्यान्डलिङ सहितको स्मार्ट टीएफटी टचस्क्रिन कन्सोल रहेको छ ।

त्यसैगरी रिमोट इम्मोबिलाइजेसन, गाइड–मी–होम लाइट्स, जिओ–फेन्सिङ, एन्टी–थेफ्ट प्रोटेक्सन र एक्सिडेन्ट डिटेक्सन लगायतका एड्भान्स्ड सेफ्टी टेक्नोलोजीको प्रयोग गर्न सकिन्छ ।

बजाज अटोको एसिया रिजन, एक्सपोर्ट बिजनेस युनिटका भाइस प्रेसिडेन्ट मनिस थापरले भारत बाहिर समेत इलेक्ट्रिक टु ह्विलरको बजार फैलाउने प्रयत्नको एक कदमको रुपमा यसले प्रतिनिधित्व गरेको बताए । क्लासिक चेतक स्टाइलिङ मार्फत हालका युवा र टेक–सेभी राइडरलाई अत्याधुनिक प्रविधि प्रयोगमा यसले प्रोत्साहन गर्ने उनले बताए ।

गोल्छा ग्रुपका निर्देशक अभिमन्यु गोल्छाले पहिलो अन्तर्राष्ट्रिय लन्चको रुपमा बजाज चेतक ३५०१ नेपालमा लन्च गर्न पाउँदा बजाज अटोसँगको सहकार्यप्रति गर्व लागेको बताए । उनले यो इलेक्ट्रिक मोबिलिटीप्रतिको एक महत्वपूर्ण कोशेढुंगा मात्र नभई विश्वकै विश्वसनिय ब्रान्डप्रतिको दीर्घकालीन सहकार्यको प्रतीक समेत भएको बताए ।

बजाज चेतक इलेक्ट्रिक स्कुटरको वारेमा बुझ्न र अनुभव गर्न काठमाडौंको नक्सालस्थित अत्याधुनिक कस्टमर एक्सपेरियसन्स जोन निर्माण गरिएको छ । विभिन्न डिलरमार्फत सो स्कुटर बुकिङ पनि गर्न सकिन्छ । यसको मूल्य ३ लाख २४ हजार ९ सय रुपैयाँ निर्धारण गरिएको छ ।

आगामी साउन २१ देखि प्रारम्भ हुने नाइमा नेपाल मोबिलिटी एक्सपोमा समेत यो स्कुटर प्रदर्शन हुने कम्पनीको भनाइ छ ।