घट्याे बागलुङ-पोखरा विद्युतीय माइक्रो बसको भाडादर

धौलागिरी–गण्डकी यातायात सेवा प्रालि बागलुङले संचालन गरेको विद्युतीय (ईभी) माइक्रो बसको भाडादर समायोजन गरेको छ। प्रालिले बागलुङ–पोखरा विद्युतीय माइक्रो बस संचालन गरेको एक वर्ष पुगेको अवसरमा भाडादर घटाएको जानकारी गराएको हो।

यसअघि लिँदै आएको भाडामा ५० रुपैयाँ घटाएको प्रालिका अध्यक्ष उमेश केसीले जानकारी दिए। बागलुङ–पोखरा भाडा ४५० रुपैयाँ रहेकोमा चैत्र १ गतेदेखी ४०० रुपैयाँ लागू हुनेछ। त्यसैगरी म्याग्दी–पोखरा पनि ५५० रुपैयाँबाट घटाएर ५०० रुपैयाँ कायम गरिएको अध्यक्ष केसीले बताए। 

बागलुङ–पोखराका लागि गत वर्ष फागु पूर्णिमाकै दिन विद्युतीय माइक्रो बस सेवा संचालन गरिएको थियो। सुरुवाती चरणमा दुई वटा बसबाट सेवा संचालन गरेको बागलुङ–पोखराका लागि हाल २० वटा माइक्रो बस संचालनमा आएका छन्। प्रालिले म्याग्दीको बेनीबाट पोखराका लागि पनि ५ वटा बस संचालन गरेको छ भने बागलुङ– नारायणगढका लागि पनि ५ वटा बस संचालनमा ल्याएको अध्यक्ष केसीले जानकारी दिए।

विद्युतीय सवारी साधनको बढ्दो माग र प्रयोग हुन थालेपछि प्रालिले सेवालाई थप व्यवस्थित गराउन भाडादर घटाएको हो।