यस्तो छ चार कम्पनीको सहकार्यमा बनेको अवतार ०६टी, फुल चार्जमा १२५० किलोमिटर रेन्ज

चीनको अग्रणी अटोमोबाइल ब्रान्ड अवतारले आफ्नो नयाँ अत्याधुनिक विद्युतीय वागन अवतार ०६टी लन्च गरेको छ। सो गाडी चांगान अटोमोबाइल, हुवावे र सीएटीएल जस्ता कम्पनीहरूको सहकार्यमा निर्माण गरिएको हो ।

अवतार ०६टीमा शक्तिशाली तीनवटा विद्युतीय मोटर जडान गरिएको छ, जसले संयुक्त रूपमा करिब ९५५ हर्सपावर उत्पादन गर्छ। यसका कारण सो गाडी विश्वकै शक्तिशाली विद्युतीय सवारी साधनमध्ये एक मानिन्छ। साथै, यसमा अल ह्विल ड्राइभ सिस्टम पनि उपलब्ध छ ।

यो गाडी दुई भर्सनमा उपलब्ध हुनेछ । पहिलो प्योर इलेक्ट्रिक भर्सन हो, जसले लामो दूरीको यात्रा सुनिश्चित गर्छ। दोस्रो एक्सटेन्डेड रेन्ज भर्सनमा सानो टर्बोचार्ज्ड इन्जिन जडान गरिएको छ, जसले जेनेरेटरको रूपमा काम गर्दै ब्याट्री चार्ज गर्न सहयोग गर्छ। यस प्रविधिको मद्दतले गाडीले एक पटक चार्जमा करिब १२५० किलोमिटरसम्म यात्रा गर्न सक्ने दाबी गरिएको छ।

अवतार ०६टी को इन्टेरियर निकै आधुनिक र प्रिमियम देखिन्छ। यसमा हुवावेको हार्मोनी ओएस सिस्टम, उन्नत सुरक्षाका लागि लिडार सेन्सर र एड्भान्स्ड ड्राइभर असिस्टेन्स सिस्टम जस्ता अत्याधुनिक फिचर समावेश गरिएको छ।

करिब ५ मिटर लम्बाइ रहेको यस गाडीमा सेमी हिडन डोर ह्यान्डल, आकर्षक रियर स्पोइलर र स्पोर्टी डिजाइन प्रदान गरिएको छ । साथै, भित्री भाग फराकिलो र आरामदायी भएकाले लामो यात्रामा यात्रुहरूले उत्कृष्ट अनुभव प्राप्त गर्ने अपेक्षा गरिएको छ।