अटो मेकानिक्स व्यवसायी संघद्वारा अक्सिजन सिलिन्डर हस्तान्तरण

काठमाडौं – नेपाल अटो मेकानिक्स व्यवसायी संघले स्वयम्भुस्थित आनन्दकुटी आइसोलेसन केन्द्रलाई अक्सिजन सिलिन्डर हस्तान्तरण गरेको छ । संघले काठमाडौंको कलंकीदेखि बालाजुसम्म सिलिन्डर संकलन गरी हस्तान्तरण गरेको हो ।

संघले सांसद जीवनराम श्रेष्ठ र काठमाडौं महानगरपालिका वडा नम्बर १५ का वडाध्यक्ष एवं महानगरपालिकाका प्रवक्ता ईश्वरमान डंगोललाई १३ थान अक्सिनज सिलिन्डर हस्तान्तरण गरेको हो ।

संघका अध्यक्ष ठाकुरप्रसाद न्यौपाने, प्रमुख सल्लाहकार महेश बज्राचार्य, सचिव सुमन सुवेदी, सहकोषाध्यक्ष रामप्रसाद भट्टराई, सदस्य फुलबहादुर लामाको उपस्थितिमा सो कार्य सम्पन्न भएको थियो ।

त्यसैगरी कोटेश्वरदेखि सानेपासम्म जम्मा गरिएका १३ थान सिलिन्डर पाटन स्वास्थ्य बिज्ञान प्रतिष्ठान, पाटन हस्पिटलका प्रशासकिय अधिकृत श्री लिला राज आचार्य लाई हस्तान्तरण गरिएको छ ।

अध्यक्ष ठाकुर प्रसाद न्यौपाने, कार्यसमिति सदस्य बद्रि कुमार श्रेष्ठ, संस्थाका सदस्य नैना तामाङ्गको उपस्थितिमा सो हस्तान्तरण समारोह सम्पन्न भएको थियो ।

संघले सदस्यहरुसँग रहेका खाली वा भरिएका सिलिन्डर उपलब्ध गराउन आग्रह गरिरहेको छ । नियमित रुपमा यस्ता सिलिन्डर जम्मा गरी हालको विषम परिस्थितिमा विभिन्न निकायलाई हस्तान्तरण गरिने र यसबाट कोरोना भाइरस नियन्त्रणमा सहयोग पुग्ने अपेक्षा गरिएको संघले जनाएको छ ।