वर्कसपका लागि नयाँ दरको कर लागू गर्न अटो मेकानिक्स व्यवसायी संघले ग-यो महानगरपालिका समक्ष माग

काठमाडौं – नेपाल अटो मेकानिक्स व्यवसायी संघले काठमाडौं महानगरपालिकाले लगाएको विभिन्न व्यावसायिक कर अव्यावहारिक रहेको भन्दै नयाँ दर लागू गर्न माग गरेको छ ।

संघ र महानगरपालिका बीच गत जेठ २६ गते यस सम्बन्धी अन्तक्र्रिया समेत सम्पन्न भएको थियो । सोही अन्तक्र्रियाका आधारमा संघले नयाँ दरको कर प्रणाली लागू गर्न माग गरेको छ ।

नेपाल अटो मेकानिक्स व्यवसायी संघका महासचिव सुशील ढकालद्वारा हस्ताक्षरित माग पत्र ढकालका साथै उपाध्यक्ष माधवबहादुर रिमाल र निवर्तमान अध्यक्ष दीपक खड्काले महानगरपालिकाका राजस्व विभाग प्रमुख डा. शिवराज अधिकारीलाई बुझाए ।

यस अनुसार इन्जिनियरिङ वर्कसपका लागि १५ हजार, बडी निर्माण मर्मत, टर्बो हाइड्रोलिक, पम्प नोजल इन्जेक्टर र लेथ वर्कसपका लागि ७ हजार ५ सय रुपैयाँ कर लागू गर्न माग गरेको छ ।

संघले इन्जिन मर्मत वर्कसप, डेन्टिङ वर्कसप र स्प्रिङ पत्ता वर्कसपका लागि ५ हजार रुपैयाँ लागू गर्न माग गरेको छ । त्यसैगरी पेन्टिङ वर्कसप, हेड मर्मत वर्कसप, अटो इलेक्ट्रिक वर्कसप, सिट मर्मत र टायर पन्चर मर्मतका लागि ३ हजार रुपैयाँ करको दर लागू गर्न माग गरेको छ ।

काठमाडौं महानगरपालिकाको अर्थ सम्बन्धी प्रस्तावलाई कार्यान्वयन गर्न बनेको ऐनमार्फत विभिन्न प्रकारका अटोमोबाइल वर्कसपहरुलाई वार्षिक रुपमा २५ हजार रुपैयाँ सम्म करको व्यवस्था गरिएको र साना वर्कसप व्यवसायीहरुका लागि यो कर व्यावहारिक नभएकाले नयाँ करको दर लागू गर्न सुझाव दिएको संघका निवर्तमान अध्यक्ष दीपक खड्काले बताए ।

अन्तक्र्रिया पश्चात महानगरपालिकाले नयाँ करको वारेमा सुझाव मागेको र आफूहरुले सोही अनुसार नयाँ दर माग गरेको संघको भनाइ छ । यस अनुसार वर्कसपका लागि बढीमा १० हजार रुपैयाँ कर लागू गर्न संघले सुझाव दिएको छ ।

त्यसैगरी हाल दिदै आएको बहाल करको दर १० प्रतिशत व्यावहारिक र यथार्थपरक नदेखिएकाले यसलाई ५ प्रतिशत लागू गर्न समेत संघले माग गरेको छ ।

संघको माग अनुसार आगामी दिनमा करको दरलाई परिमार्जन गरिने महानगरपालिकाको आश्वासन पाएको अटो मेकानिक्स व्यवसायीहरुले बताएका छन् ।