प्रशासनको स्वीकृति : उपत्यकामा विहान ९ बजे सम्म अटो मेकानिक्स व्यवसायीहरु आवतजावत गर्न सक्ने

काठमाडौं – अटो वर्कसप सञ्चालन गरिरहेका अटो मेकानिक्स व्यवसायीहरु राती ९ बजे देखि विहान ९ बजे सम्म एक स्थानबाट अर्को स्थानमा आवतजावत समेत गर्न सक्ने भएका छन् ।

नेपाल अटो मेकानिक्स व्यवसायी संघको माग अनुसार जिल्ला प्रशासन कार्यालय काठमाडौंले यो स्वीकृति प्रदान गर्ने निर्णय गरेको हो । यो भन्दा पहिले जिल्ला प्रशासन कार्यालयले प्रकाशित गरेको सूचनामा सो अवधिमा वर्कसप खोल्न अनुमति दिएको भए पनि व्यवसायीहरु वर्कसप आवतजावत गर्नका लागि भने समस्या भोग्दै आएका थिए ।

संघले गरेको माग अनुसार अब व्यवसायीहरु संघको परिचय पत्रका आधारमा आवतजावत गर्न सक्ने छन् ।

नेपाल अटो मेकानिक्स व्यवसायी संघका अध्यक्ष ठाकुरप्रसाद न्यौपाने र उपाध्यक्ष माधवबहादुर रिमालका साथै निवर्तमान अध्यक्ष दीपक खड्का समेतको प्रतिनिधि मण्डलले काठमाडौं जिल्ला प्रशासन कार्यालयमा गएर आवश्यक सहजीकरणका लागि अनुरोध गरेको थियो । यसका आधारमा प्रशासनले सो अनुमति दिएको अध्यक्ष न्यौपानेले बताए ।

फ्रन्टलाइनमा खटिएका स्वास्थ्यकर्मीका साथै अन्य अत्यावश्यक कार्यका लागि सञ्चालन भएका सवारी साधनहरुको मर्मत सम्भार गरी सञ्चालन योग्य बनाउनु अटो मेकानिक्स व्यवसायीहरुको कर्तव्य भएको र अटो मेकानिक्स पेशा व्यवसाय पनि अत्यावश्यक सेवा भित्र पर्ने व्यहोरा समेत संघले अवगत गराएको थियो ।